Omupopiliko gwopakathimbo gwanakusapresidente Hage Geingob Sisa Namandje, okwa li a tumbaleke uupenda wongundu yoondohotola ndjoka ya li tayi ungaunga nomupresidente sigo opehulitho lye. A totha mo ongundu yoondokotola yatano poshigumbo shanakusa moshilandopangelo mOsoondaha, Namandje okwa ti ofamili oya nyanyukilwa iilonga yosipana ndjoka yuunamiti uule wiiwike ya piti sigo opehulitho lyaGeingob. Geingob, ngoka a li e na omimvo 82 okwa li a hulitha koongulasha dhOsoondaha sho a li e na uuvu wokaankela.
“Otwa nyanyukilwa iilonga yeni mbyoka mwa longa muule wiiwike twa zi… Onde mu mono tamu longo nuudhiginini ohela, otwe mu mona tamu kondjo ngaashi tashi vulika sigo oompoka pu thike oonkondo dheni,” ta ti ngaaka.
Namandje okwa ti oondokotola mbaka oya kala nokuungaunga napresidente sigo opethimbo mpoka a li a yi molweendo lwokoAmerica, hoka a li a ka mona omayakulo gopaunamiti.
“Sigo aluhe otu na ongunga yiilonga yeni. Osha kala ethimbo edhigu noonkondo, omwa idhenga olweendo pamwe napresidente, mwa topoka noofamili dheni nomwa kambadhala ashihe tashi vulika. Ashike kehe uuvu owu na ashike iizemo iyali,” ta ti ngaaka. Geingob okwa li a galukile moNamibia mEtitatu konima sho a li a mono omayakulo guunamiti wokaankela koAmerica.
Omwedhi gwa zi ko Geingob okwa li a tseyithile oshigwana kutya okwa li a monika okaankela. Momasiku 24 Januali, ombelewa yapresidente oya li ya tseyitha kutya Geingob okwa ya koAmerica sho a hiywa kaanawino dhingi koLos Angeles opo a ka mone epango.
Namandje okwa ti manga epangelo tali longekidha oshituthifumbiko shaGeingob, ohungi nomagalikano otaga kala taga ningwa esiku kehe potundi 18h00 poshigumbo shaGeingob mOvenduka.
-Nampa