Namibiab Kollege !Gaugaba xu hâ ǁkhāǁkhākhâidi (Namcol) dis ge ǂgā-amdi hîa ǂhanuo!nâ sîsenǀû kais dīǀgaugu tsî ǁnā 100 xa a !nāsan hîa sîsenǀû kaihes di !ân di ǁkhâkorobe !khō!oamaride mātare tama is din xa !oahe hâ. Nē sîsenaon ge mîǁguisa ǁaeba !khōǂgā hâ ǁnâuguxoaǁguigu !naka gere sîsen.
Nē mâsib ge nē tsâǀkhāsa sîsenaon ǁaegu kai ǂkhîo!nâsiba hā-ū hâ, ǀnîn Namcolsan 20 kuriga sîsenba hâ ti gere mîse. Mutarere Nguvauvab, nē sîsenaon di mîgowaba-aob gere mîsa !oas ge Namcolsa nē sîsenaona ǁîn ǁkhâkorobe !khō!oamaridi ǀkha ǂnû!nâ hâ.
“!Nāsa sîsengu Namcols di gu ge nē sîsenaon hîa mîǁguisa ǁaeba !khōǂgā hâ ǁnâuguxoaǁguigu !naka gere sîsenn tsî ǁgau!nâ-aon (tutorn) xa gere dīhe. ǀN tutorn ge ai!â gere !kharu Satertaxtsēs tsî ǂoa ge wekheb !nâ ǁîn di !khō!oamaride ge mātarehe,” tib ge gere mî.
Mîgowaba-aob noxopa gere mîs ge, Namcols ge nē !gûǁnâǀgaub sîsenaona sîsenǀû kais dib !nâ, ǁîs di ǂhunuma xoaǁguigu tsî ǀgau ra ǂhanuǁguiga a !ûǂam !khaisa.
Namcols ge māǂui ǂanǂans !nâb ge ǁîs Dana Sîsenǂuira Mâisab, Ngepathimo Kadhilab ge mî, nē sîsenǀû kaihe ge khoen ge 16 !Khaitsâb 2025 dis ai a ǂanǂanhe !khaisa, ǁnāti ī mîǁguib hîan ge ǀawemā!nans ǁanina 28 !Hoaǂkhaib dis ai a ūs diba. ǀUni mîǁguib nēpa ge ūheb ge, mîǁguisa ǁaeba !khōǂgā hâ ǁnâuguxoaǁguigu !naka a !gaesa sîsenaona ra tsâǀkhā gaxu ǁaeba !goaxa ǁgoaǂuisa oresa hōbasa, !gōsase ǂhanusi aib ai ra hâ ǀkharaǀkharasin ǂgaoǀkhādi ai nî dīǀoaoase.
“Namcols ge ra ǂan!gâ, nē a tsâǀkhāsa ǀnî sîsenaon ūhâ ǂâiǂhansende tsî ǁkhādi nēs ǀkha ra !gûǀhao !gomsin tsîn hoana. Namcols di daodi ge !oahâ ǁgamǁaredi hoa !âhuru-aon ǀkha ūhâs !aroma a ǁkhowa-amsa, ǁnān hîa nē mâsib xa ra tsâǀkhāhen tsî sîsengu ǂnoaba-aon tsîn hoana !khōǂgā hâse, ǁawoǁawo nîse gaxu ǁaebas noxopa nē ǂnûiǂgāsa ǂgaoǀkhāsa !harib ai hâ ǁgau!nâsa hoa Namibiaǁîna nî māse,” tib ge ge mî.
Kadhilab ai!â ge mîs ge, Namcols kurigu di !oede mîǁguisa ǁaeba !khōǂgā hâ ǁnâuguxoaǁguigu !naka gere sîsen sîsenaon xa !nāsa sîsengu âs !nâ gere sîsenbahesa, ǁaupexa 49% !khōǂgā hâse.
“ǀAwemā1nans ge sîsenaon hîa ǀgaisa !harodi !nâ a sîsenxan di ǁnâuguxoaǁguiba nē kurib di ǀHōǂgaeb kōse ge mâiǂui.
Nē ǀasa ǁnâuguxoaǁguib ge !gāsase ra mî, ǀHōǂgaeb khao!gâ-i ǁkhawa hāǀaro ra mâiǂui-e hâ tidesa,” tib ge Kadhilaba ge mî.