ONDANGWA – Omupedu Presidente wehangano lovanhu ve na oulema woshipa moNamibia Walde Kambabi okwa ti ka kwa li shipu okutota po ehangano lavo molwashi ovanhu ka kwa li va hala oku pwikina.
Edi Kambabi okwe di popya pedimbuluko lefiku lovanhu ve na oulema woshipa mounyuni olo la dimbulukiwa kOndangwa Etitano.
Efiku e li oha li dimbulukiwa mounyuni omudo keshe momafiku 13 nola fimana kovanhu ve na oulema woshipa nohali kwatelwa komesho kehangano olo loAssociation of People with Albinism.
Neudo Efiku ola dimbulukiwa koshi yoshipalanyole “Fimaneka oufemba wange, eameno loshipa shange ola fimana.”
“Paife otwa hafa molwashi ehangano e li ole twetela omauwa. Onda pandula Ovanamibia eshi tava twikile okuyambidida ehangano letu,” ta ti.
Ounona, ovanyasha, ovakulupe ve na oulema woshipa okwa li va holoka momwaalu muhapu veu dite etumba okudimbuluka efiku lavo.
Kambabi okwa pandula epangelo eshi ta li twikile okuyandja oshimaliwa shopendjela kovanhu ve na oulema woshipa.
Okwa yelifa ta ti elalakano lehango lavo okuyambidida nokukalekapo onghalo nawa yovanhu ve na oulema woshipa.
Okwa weda po ta ti ehangano lavo ota li kelele opo ovanhu ve na oulema woshipa ha ningilwe okatongo molwashi navo ovanhu ngaashi naana vakwao.
“Ovanhu ve na oulema woshipa ovataalela omashongo okuningilwa okatongo koilongo ya yooloka ngaashi okudipawa,” ta ti.
Kambabi okwa ti kondje yoilongo imwepo ovanhu ve na oulema woshipa oha tetwa eexwiki noipanyala ile tava dipawa osho shi li sha puka.
“Natango ehangano letu oha li ka konga omakwafo ngaashi omaadi okuvava, omambele okulela omutenya nomakende ndele ta li yandje kovanhu ve na oulema woshipa,” ta ti.
Okwa kumaida ovanhu ve na oulema woshipa opo vaha ende momutenya noshoyo okuvava omaadi efiku keshe.
“Ovadali tonateleni nawa ounona ve ni ve na oulema woshipa. Ounona ina va tumwa momutenya shaashi otashi eta vakwatwe komukifi wokangela woshipa,” ta ti.
Efiku olo ovanhu ve na woshipa ova pewa omambele okukelela omutenya noshoyo omaadi okuvava.
Konima yoshindingili, ovanhu ve na oulema woshipa okwa li tava ningilwa omakonakono koshipa shavo nokutulwa omaadi omiti koipute.
Omundokotola Hileni Nangolo a dja koshipangelo shaShakati okwa ti elalakano lomakonakono okukelela omukifi wokangela koshipa. “Omakonakono aa okwa fimana molwashi otaa kelele ovanhu ve na oulema woshipa vaha kwatwe kokangela,” ta ti.
Okwe va kumaida opo alushe va ka tala omaadi okuvava pefimbo koipangelo molwashi oshipa osha pumbwa okutulwa omaadi efiku keshe.
Eliaser Moses e na oulema woshipa okwa pandula eshi tava tyapula efiku lavo lovanhu ve na oulema woshipa mounyuni.
Okwa ti omunhu ngeenge e na oulema woshipa itashi ti kutya oku na omupya ndele eyambeko. –fhamalwa@nepc.com.na