Ompangulilo yaMangestalata gwaNdangwa oya tindile omunambelewa yambidhidhi nale gwOmupilima opo a ifutile mo mondholongo omolwoshipotha shekwato koonkondo lyokanona komimvo omugoyi.
Penda Leonald Namuhuja (65) okwa ningi esiku mompangulilo ta kondjitha andola opo a pewe eifutilo, ashike omweeti gwiihokolola yepangelo okwa ti oku na uumbangi wa yela tawu ulike kutya Namuhuja okwa longo iilonga mbyoka ya igalala.
Otaku hokololwa Namuhuja ngoka a li wo omuyambidhidhi gwAapilima yotango yopetameko a li a longele okanona hoka ke mu pamba omahepeko gopaihulo iikando ya yooloka.
Okwa holokele lwotango mompangu momasiku 2 Mai ihe oshipotha she osha li shu undulilwa komasiku 29 Mai nuumvo, opo a vule okuninga eyindilo lyeyifutilemo.
Sha ikolela komupevikuluntu gopolisi Hermanus Neel, oshiningwanima shoka osha ningwa muMaalitsa nuumvo iikando ya yooloka momukunda Oniihandhi momudhingoloko gwOniipa. Anuwa
Namuhuja anuwa okwa kala ha iyakele mondunda yokanona uusiku ngele ka kotha ye teka heke nuuleke kaaka popye sha, opo a vule oku ka kwata koonkondo.
Oshinima shika anuwa oshe ya puuyelele sho omukulukadhi gwe a tameke ta fekele iilonga ya longelwa okanona kuNamuhuja. Anuwa okwa li a tokola oku ka thindikile okanona kegumbo limwe lyaapambele, hoka inaa gandja omatompelo kutya oshike inaaya hala we okuza pamwe nokanona.
Aapambele yokanona anuwa okwa li ya dhimbulula kutya okanona itaka ende nawa, e taye ka fala koshipangelo hoka ka monika kutya okaningi ethimbo taka kwatwa koonkondo.
Sho okanona ka pulwapulwa komuhingimwenyo, opo ka popi kutya oka kala nokukwatwa koonkondo kuNamuhuja, ihe oka lombwelwa kutya ina ke shi popya.