Omusamane gwotango moshilongo Epaphras Denga Ndaitwah opamwe noominista mbali oya li ya kwatele oshigwana komeho, pethimbo lyokupatulula opoloyeka yokulwitha omahepekathano moshilongo. 

Opoloyeka ndjoka ya li ya tetekelwa komunyanyo, oya patululilwa pambelewa ohela po-UN Plazza moWindhoek. 

Ndaitwah okwa ti oye ya po nopoloyeka ndjoka sho kwa tothwa mo uupyakadhi mboka tawu pumbwa ekandulepo. 

“Ito vulu okuya po nekandulopo ngele kapu na uupyakadhi. Sho osho shoka nena kwa totwa oproyeka ndjika opo yi yambidhidhe nokuhulitha po omahepeko ga taalela oshigwana,” ta fatulula ngaaka.

Minista guuthemba gwomuntu Emma Kantema osho wo minista gwomauyelele Emma Theofelus oya li ya waimine Ndaitwah koshiindingili shoka. 

Kantema ngoka a li oye omupopi gwesiku okwa ti, okwa lopotwa iipotha yomahepeko ya pita 4 400 okuza muApilili gwomumvo gwa yi sigo Febuluali gonuumvo, omwaalu ngoka tagu limbilike.

Ta ti, iipotha mbyoka oyindji unene, notayi gandja omalimbililo onkene okwa pumbwa etokolo lya kola ndyoka tali kandula po iiningwanima yomahepeko momagumbo. 

“Namibia okwa kala nokukambadhala okukandula po omahepeko momagumbo okupitila momikalo dha yooloka, shoka sha kwathele okuhwepopeka onkalo nonando inayi kala nawa thiluthilu,” ta popi ngaaka.

Kantema ta ti epangelo otali tsikile okulonga nuudhiginini okuhwepopaleka onkalo yomahepeko mokati koshigwana. 

Ta gwedha ko kutya omwaalu ohagu ulike kutya aantu yangapi ya taalela omahepeko nayangapi ya pumbwa omakwatho osho wo iitopolwa yini yi na oshigwana sha taalela omahepeko shoka natango tashi ulike wo monkalo moka mu na oshigwana.

“Omwaalu ohagu tu pe wo kutya oshitopolwa shini shi na aantu ye na omaupyakadhi, yangapi ya mwenena omahepeko nayangapi ya manguluka noyu uvite ko uuthemba wawo,” Kantema ta ti ngaaka.

Okwa indile oshigwana shi kale aluhe tashi lopota uuna sha taalela omahepeko ihe hakumwena.

Theofelus okwa fatulula kutya oproyeka ndjika otayi kala tayi longo nuuyuuki osho wo uudhiginini opo ku hulithwe po omahapeko ngaashi edhina lyawo tali ti, “Hulithii po omahepeko”.

“Onda ndhindhilike kutya olundji ohatu kala tu na uuyelele waamboka ya ningwa iihakanwa ihe katu shi ngoka e yi longa, ngiini? Shoka itashi shuwa, oshoka aluhe ope na ngoka e yi longa,” ta nyenyeta ngaaka.

Ta ti, oshigwana nashi kale tashi lopota nokutotha mo mboka taya longo iilonga inaayi uka, opo ya pewe omageelo. 

-vkaapanda@nepc.com.na