OSHAKATI – Epandja lyokomalungula tali ithanwa WhatsApp, olya kuthwa ko unene okugongela oshimaliwa uuna pe na omupambele a hulitha omanga hashi kala oshidhigu okuyambidhidha nakusa omanga e li momwenyo uuna a li a taalela omaupyakadhi. 

Oopastoli yoongeleka dha yooloka osho wo aahwahwameki oya gandja omayiyuvo gawo kombinga yoshimaliwa hashi gongelwa sha thika ko N$200 000. 

Oyendji taya ti onkalo ndjoka oya pumbwa okuhula po. 

Omusita gongeleka yaAngelican Tarah Shalyefu okwa ti, oku na omayiyuvo gaali kombinga yonkalo ndjoka nonando unene ta thindi omuthindo kutya, Aanamibia oya pumbwa okulundulula. 

“Sha ikolela kombiimbeli otaku ti, ngoka e li muudhigu okwa pumbwa omayambidhidho shi vulithe ngoka e li menyanyu. Onkene oshi li mondjila uuna aantu taya yambidhidhathana ethimbo lyuudhigu, ihe hangaashi tashi ningwa ngashiingeyi,” ta popi ngaaka. 

Ta popi kutya miilongo ya putuka ito dhimbulula kutya ombila yomuyamba nohepele oyinipo oshoka adhihe odhi li ashike methano limwe, ashike moNamibia omawendo gaasi owu na okuga yoolola. 

Shalyefu okwa ti, oshimaliwa hashi gongelwa kAanamibia ya silwa oto tila, ihe okwa li ya nyengwa okukwatha omuntu ngoka omanga a li momwenyo. 

“Tashi vulika otee nomboloto kakwa li e yi shi, ihe ngele a hulu ko oto mono aakwanezimo taya zi kuushimba taya gandja iimaliwa ya thika N$10 000, otashi ti ngiini?” ta popi ngaaka. 

Ta ti, ope na uunona wumwe wa pumbwa omayambidhidho ngaashi gokufutilwa omatando taga pula oshimaliwa oshinene, ihe kape na ngoka ta vulu oku wu yambidhidha. 

Shalyefu okwa ti, otashi kala nawa ngele Aanamibia taya lundulula nokuhulitha po okulongitha omaliko momikalo inadhi uka. 

Apostoli Diaxel Kaulumbwa gwongeleka yoHouse of Healing Ministry okwa ti, ita tsu kumwe nonkalo ndjoka yokugongelela omafumbiko noshimaliwa sha thika N$200 000, omanga kwa li ta vulu oku yi pewa e li momwenyo. 

“Oosa kashi shi oshituthi shenyanyu, ihe oshoombwiinayi, onkene osha pumbwa ashike okulongekidhwa na kehe shoka shi li po, ihe hakulongitha oshimaliwa oshindji oku shi ninga,’’ ta popi ngaaka. Ta ti, N$30 000 oya gwana okulongekidha oshituthifumbiko, okulanda oshiketha, oshinyama noshithima nosho tuu kehe tashi pumbiwa. 

Ihe nena oto adha osilaye, oonyama dha kangwa niikulya oyindji iiwanawa moosa, ta pula kutya shoka otashi ti ngiini? 

Kaulumbwa ta ti, ngaka osha fa okwiiyulika, kashi shi we oosa. 

“Aantu yamwe otaya vulu okusa koluhepo, yamwe oyi ikutha oomwenyo omolwonkalo ondhigu ya taalela, a hala oku ya kosikola ihe kape na oshimaliwa, nenge a hala okutameka ongeshefa ihe kape na ngoka he ya po nedhiladhilo lyoku ya ningila epandja lyokuyambidhidhwa,” ta nyenyeta ngaaka. 

Ta ti, kashi na shoka tashi kwatha okukwathela omusi, omanga kwa li ta vulu okukwathelwa omanga e li momwenyo. 

Junias Nghitewapo pastoli gwaanadholongo okwa ti, ethimbo lyiituthi ayihe mbyoka iyali, aantu ohaya yambidhidhathana omolwuukwawowanankali. 

“Ashike, otandi kumagidha aantu ya kale taya ningi iituthi shi thike poondjato dhawo, ihe hamolwokweelekela mboka ya ningi shi vulithe po,” ta kumagidha ngaaka. Omuhwahwameki gwomondoolopa yOshakati Amon Newaka okwa ti, omaso oga ningwa omboloto yaantu paife. 

“Uuna omuntu a hulithashoka hashi tondekelwa tango paife okutota epandja lyokuumbilwa oshimaliwa. Nuuna iimaliwa mbyoka ya hupu po ohashi ka eta oontamanana konima yefumbiko, oshoka kehe gumwe okwa hala okumona ko sha,’’ ta popi ngaaka. 

Ta ti, otashi kala oshihwepo ngele taku shunwa konkalo yonale, oosa nadhi kale ashike oosa ihe kashi shi okuyotha oonyama. 

-vkaapanda@nepc.com.na