Ngoloneya woshitukulwa shaMusati Immanuel Shikongo okwa ti ombelewa yaye otai ka longela kumwe nomalelo opamufyuululwakalo a yooloka.

Immanuel okwe lipyakidila nokutalel apo omalelo opamifyuululwakalo a yooloka monooli.

Okwa ti oshivike sha dja ko okwa talela po omalelo opamifyuululwakalo ngaashi elelo laUukwambi, Ombalantu osho yo Oukwanyama.

Pefimbo a talela po kOuhamba kOmhedi ngoloneya okwa ti elalakano laye okukaleka po oukumwe nomalelo opamifyuululwakalo ayeshe osho yo okulongela kumwe.

“Osha fimana ngeenge ombelewa yange tai longele kumwe noikondo ya yooloka ngaashi opolifi, ouhaku, ovanangeshefa, ovanafaalama, ehongo,” ta ti.

Immanuel oo a ulikwa omwedi wa dja ko okuninga ngoloneya okwa ti ombelewa yaye itai ka ningila ovanhu okatongo.

Ngoloneya natango okwa ti elalakano lokutalelapo omalelo opamifyuululwakalo okushivafana.

Chief Ndilimani Iipumbu ta wilike oshitunda shaUukwambi okwa ti okwa pandula eshi ombelewa yangoloneya tai ka longela kumwe nomalelo opamifyuululwakalo.

Meekulu Ohamba yOvakwanyama Martha Mwadinhomo yaKristian Nelumbu okwa ti elelo lOukwanyama otali twikile okukala noukumwe noveleli koikondo ya yooloka.

-fhamalwa@nepc.com.na