Rudolf Gaiseb 

ǂGuro Ministeri, Elijah Ngurareb ge Ugandab ǁgab ge ūhâ i saris khao!gâ, ǂhâsasib Afrikab ǀgui!nâxasib tsî sâuǁkhāsib dib ǂōrisasib ǀkha nî kōǀîhe !khaisa gere ǀgomǀgom!gao. 

Ai!âb ǁîba ge mîs ge, Afrikab di ǀgui!nâxasib ǀguib nî īǁkhā kaisa, kurus di mineraln di !khūsiban Afrikab ǁanǂgsabena nî hoatsama domdore xu !khaisa. ǁNā saris !nâb ge Ngurareba ge mûǂan, Namibiab ǀkhamasa tsî ǂûǂûxa ǁkhāǁkhāsende Ugandab di ǂhanuǁguis sîsenǀgaugu, !gōsase oli-i tsî xas-e !khōdanas ǂnamipe a hō ǁkhā !khaisa. “Ugandab ge sada !hūb xa buruxase ais ai !khoegaru. ǁÎn ge ǂhâbasa tsî sîsenǂuiba ūhâ dīǀgaun, ǂhanu-aisib daoǁgaugu tsî ǂhanusi ǁgaragu tsîna, tsî ǁîn di oli-e xu nē kuri ǀnai !gâiba a ǀama ǁkhā. 

Sada ge ǁîna ǁnā ǀkhāb ai a hui ǁkhā, tsî da ge ǁnā-amaga ge mîǁgui hâ a !gaeǁaresa da nî ǀgaiǀgai tsî ǁawosa kai !khaisa,” tib ge ge mî. ǂGuro MInisteri ge ǂoa ge wekheb di Denstaxtsēs ai Ugandab di presidenti, Yoweri Kaguta Musevenib hîa 7ǁî !nās ase nē !haros !nâ ǁkhawa gere mâiǂgā hâ i. Presidenti ge Ugandaîna ge mîba “ǀGuis khami i Ugandaǁî-i tsîn ge !aruǀî ǁom tide,” tib ge ǁîna gere ǂgaoǂgao!nâ. Mâ ǁanǂgāsabe-i hoa-i ge nî sâuǁkhāsib omkhâis !nâ hui tsî sîsenga ǂnuwis !nâ-ū nēsa īǁkhā kai. 

Ngurareb ge ǁnâugus tsî sîsenǁareb ǁgamǁarede !Nakaǂnôa presidents Jessica Alupos, senior mâisan ǂhanub din tsî ǂharugu-aon tsîn ǀkha ge ūhâ i. “ǀGui xū-i hîa da Ugandaba xu a ūbasen ǁkhā-i ge, sâuǁkhāsib ǂnamipe ǀhonkhoesisa ūs !âb ai !kharaga ǂharugu-aon gere mîsa !oa, Ugandaǁîna 70 persentga ǁaupexas ǂharugub ǂnûiǂgā-i hoa-i !nâ ūhâ, nau ǀkhāb ain Ugandab !hūǁî tamana 30 persentgu ǀhonkhoesisa ūhâse. Tsîb hâna nē dīǀgauba Namibiab !nâ tsî Afrikab ǂhabase nî sîsens kara, on ge Afrikaǁîna ǀomkhâis ǁîn !hūgu ǁkhāsigu disa xu !gâiba a ǀama ǁkhā,” tib ge ge mî. 

Ngurareb ge noxopa ge mî, Ugandab ǁkhana!oabas Namibiab ǁga hâs tsîn ǀgaiǀgaihe nî !âgu di ǀguise hâsa. Nē !hūkha ge ǀguiti ī omkhâisens ǀAweǁguiga ūhâ, ǀonǂgais ai !Hū!nāsi Omkhâisesns ǀAweǁguib (NDP) khami. Namibiab ge nēsi NDP6 ai hâ, Ugandab NDP4 ai hâse.