ǂKHOANDAWES – Epakob di ǁKhō!hanab, ǂkhoandawes !nâb ǁîba hoan xa gaxuse !goaxa, ǁnāpa a ǁkhōsa ǀnamsaben !aroma kai !gôasiba ge tani hâ ib, ge nēsi mîheǁoasa mâsib !nâ hâ. 

Nēb ge nēsi ǀawon aoxū!khaib ase ge hā. ǁNāpas ge ǁaupexa 60 kurigu di ǁaeban Epakob ǁanǂgsabena ǁîn ǀnamsabena sâsa tsî !gôasib !naka gere ǁguiǂgāsa, xawe nētsē kaise uiuixa mâsib !nâ hâsa. Khôahâ ǂkhorogu, platik ǁgarun tsî omde xu hā ra aoxūhe ǀawon ge khoesib nē ǁōǂoa gen diba !hūb ai ra !khara. 

Anastencia Gorases, Epakob di ǁanǂgāsabes tsî ǁîs di îs tsî ǁnaosab hâra nē ǁkhō!hanab !nâ ǁguihâs, ge ra mî nē !khaib taob tsî kai tsûaǂgaoba !khōǂgā hâsa, ǁgâuǂnamib a ǀkhai !khais xa ra !aromahese. 

ǂAuna khoen ge !kharu!khaib ase nē ǁkhō!hanaba ās tsî !gâi!gâisens ase ra sîsenū. 

“Kaise ǂgui kurigab ge nē ǁkhō!hanaba ǂgaeǂnamib ose hâ, tsîn ge ǁnā-amaga khoene nē !gâi tama xūna ǁnāpa ra dī. ǀNai da ge ǀhowaǀuiga ti îs tsî sida ǁnaoba ge mâiba hâ i, xawe da ge nē ǁgauo!nâ tanisens !aroma ǁkhawa 2024ǁî kurib !nâ sida ǁnaoba ǁkhawa ǀsas ǀuiba ge mâiba, ǂgurob ge khôa!āhe xui-ao,” tis ge Gorasesa ge mî. 

ǂKhoandawes !ā!khōmais di Dana Sîsenǂuira Mâisas (CEO), Sofia Eises ge ge mî, ǁîs ǀoasase nē mâsiba a ǂan !khaisa, xawes ge tarenas !ā!khōmaisa nē mâsiba oresa hōbas !aroma ūhâ ǀaweǁguigu xa !hoa tama ge i. 

ǁÎs ge mîsa !oa kha ge !ā!khōmai-aob, Elwin Gariseb tsî !ā!khōmais di mîgowaba-aob Taekulu Ueiteleb hâkha ǀguikha ǁnāti ī mā-amsa tani hâ, nē !nôa ǁhōn ai nî khomse. “ǁÎkha ǀguikha ge nē ǁhōb ai xū-e mî ǁkhā. !Hau!hausaseb ge ǁnāpa sida ǁnâuǂhurugu ǀgaub ase hâ. 

Nausa ta hui tsi ǁkhā ta ga hâ ti ra ǂâi, xawekha ge Gariseb tsî Ueiteleb hâkha ǀguikha ǂhôare-aon ǀkha !hoas !ereamsa māhe hâ,” tis ge Eisesa ge mî. 

Nē khoekha ǀhao-ūs ge īkhā tama ge ī, hoa kha ge !hūba xu ǂhanusi !ereamdi ǀkha ǂoa hâ i amaga.