Auleria Wakudumo
Oshali ehafo lafa lambishi meumbo mwa tomwa eshi ovanhu o52 va pewa eeshapi domaumbo avo mape mOkakarara Etinhe. Oshinima eshi osha talika ko onga efindano mekandulepo lomhumbwe yomaumbo modoolopa omo.
Omaumbo okwa tungwa kehangano lokutunga omaumbo moshilongo hano oNational Hpusing Enterprise (NHE), koshimaliwa shi fike peemiliona N$12.2 nokwa tungwa ashike oule weemwedi hetatu. Oproyeka yokutunga omaumbo inai yandja ashike omatungu kovakwashiwana vaKakarara ashike oya yandja yo oilonga kovakalimo veli 80 modoolopa.
Pefimbo ta yandje eeshapi domaumbo pambelewa, Minista weyambulepo leedooolopa nomikunda James Sankwasa okwa holola kutya omhumbwe yomaumbo moNamibia oya pumbwa oku endelelwa po. “Itatu dulu okukala inatu yandja omaumbo koshiwana shetu. Omaumbo a yandjwa nena otaa yandje etimaumbile koshiwana shaNamibia kutya epangelo otali kondjo noudiinini okukandula po omhumbwe yomaumbo,” Sankwasa ta ti. Minista okwa pandula NHE, elelo lodoolopa yaKakarara oshoyo ovatungi eshi la endelela po okutunga omaumbo aa. Okwa kwashilipaleka kutya epangelo otali twikile okutunga omaumbo ovanhu ovo vena oyuuyemo ili pedu, vahapu ovo havadi nokuli momalukanda.
Sankwasa okwa ti kutya vati olopota yopaife oya holola eepelesenda 29 domaumbo moNamibia ohava di momalukanda omanga eepelesenda 40 hadi di medoolopa.
Omupedunashipundi woNHE Hasting Tjipueja okwa holola kutya NHE okuna elalakano lokutunga omaumbo 10 000 keshe kodula moule weedula nhano twa taalela. “Otwa tunga nale oamumbo 185 okudja eshi twa pewa omutengenekwamwaalu woshimaliwa sho2025/2026 noha tu longo noudiinini okukala twa tunga omaumbo 905 oshoyo okutunga omaumbo 2 000 momalukanda,” Tjipueja ta ti. Omaumbo 52 a tungwa mOkakarara okwa weda omaumbo 40 oo a tungwa nale pokati ko2020 no2021. Ovanhu o92 paife ova mona omalukalwa avo mOkakarara.
Oovene vomaumbo ova indilwa opo tumbaleke nokufimaneka eudaneko lavo olo va yandja koNHE kutya otava ka futile ko omaumbo avo nonande otave keshi ninga noshimaliwa shili pedu elela. -wakudumoauleria@gmail.com