OMUTHIYA- Ehangano lokutunga omaumbo loNational Housing Enterprise ota li shi endifa  nawa okutungila ovanhu omalukalwa kondado i li pedu. 

Omupopiliko woNHE Mutonga Matali okwa popya ta ti ove li pyakidila nokutunga omaumbo 30 modoolopa yaMuthiya moshitukulwa shaShikoto.

Okwa weda po ta ti omaumbo otaa tungwa kongushu yoshimaliwa eemilliona N$6.5.

Opoloyeka yokutunga omaumbo oya tamekele muMei notai ka xula neudo muDesemba.

Matali okwa yelifa ta ti NHE okwe li pyakidila nokutunga omaumbo keedoolopa da yooloka ngaashi Ondangwa noshoyo tuu.

“Otwa mana okutunga omaumbo keedoolopa ngaashi Opuwo, Okahao, Outapi noTsandi,” ta hokolola.

Okwa weda po ta ti omaumbo 50 otaa ka tungwa kOtavi omanga omaumbo 100 otaa ka tungwa kEenhana momudo tau ya.

“Osha fimana ngeenge omunhu e na eumbo li li pashinanena opo li dule okukala po omido dihapu. Omaumbo oha tungwa a  kola notaa monika nawa” ta ti.

Matali okwa ti NHE ehangano ha li longo nondjungu noli na  ovanailonga tava longo nelitulemo okukwashipaleka kutya oshiwana otashi tungilwa omaumbo e na ongushu.

“Omaumbo ha tungwa e na eendado da yooloka. Omaumbo amwe oku na eenduda domadimo dihapu edu li fe akwao,” ta ti.

Okwa weda ta ti omunhu keshe a kufa eumbo olo ta dulu okufuta she li kwatelela  koyuuyemo yaye.

Okwa pula oshiwana opo shi talele po eembelewa davo molwashi osha fimana okupewa ouyelele kombinga yokutungilwa omaumbo.

Matali okwa ti pefimbo omaumbo taa tungwa ovanhu va dja meedoolopa omo ta mu tungwa ova pewa eemhito doilonnga yopokafimbo.

-fhamalwa@nepc.com.na