Auleria Wakudumo 

!Hū!nāsi Ommās ǂNûiǂgās (NHE) ge ǀaweǁgui hâ, 905 omde Namibiab a ǂhabase nē marikurib 2025/2026 !nâ omsa, !hūb !nâ hâ ǂharo ra om!nubusib !gôaga ǀoroǀoros ase. Omdi nēdi ge sao !ādi !nâ nî omhe, !Gomenǁgams, Tsoaxubams, Rundus, Ongwedivas, Nkurenkurus, Henties Bays, Outapis, Okahaos, Eenhanas, Okakararas, ǂNūǂgoaes tsî Katima Mulilos hâde. NHEs di mîgowaba-aob Mutonga Matalib ge New Eraba ge mîba, nē ǀaweǁguisa ǂnuwis omdi dis ǂhanub ūhâ ommās ǂnamipe ǁgūbadi di !â !khaisa.”Nēs ge ǂhanub di !âubasens tsî !Naniǁî !Hū!nāsi Omkhâisens ǀAweǁguiba (NDP6)ra ǂkhâ!nâ, tsî nēs 1nâ-ū 2 000 omde !hūb a ǂhabase omsa nî ama kai,” tib ge ge mî. New Erab ǀkhab ge ūhâ i dî!nâǁgamǁares !nâb ge Mataliba ge mî, NHEs ge ǁîs daode 1993ǁî kurib ai a ǁkhowa-amsa xu di !hūb a ǂhabase 21 545 omde ge ǂnuwihe !khaisa. tsîs nēsa NHEsa ǁîs !hūb !nâ ǂgui !gôab !nâ marisise a sī!nâhe ǁkhā omde ra ǂnuwisa, tib ge ge mî. 2024/25ǁî marikurib !nâs ge NHEsa 191 omde !kharaga !ādi Namibiab di di !nâ ge ǂnuwi. Dītoahe ge projekdi !khōǂgā hân ge 52 omde Okakararas !nâ, 34 Tsaraxa-aibes !nâ, 64 Ondangwas !nâ, 30 Omuthiyas !nâ. 11 omdi ge ǀAeǁgams !nâ Informal Settlement Upgrading Proxrammi !naka ge omhe. Nausadi ai!gûde hâ xawe i ge omde ǁaeb ai kurutoa tsî ǁkhaeǁnâsa hoaǁae !gomsib ase i, marisi mâsib tsî !hū!âde hōs xa ra !aromahese. ǁNāpab ge ommās di projekdi !aromas NHEsa tarina ra aimâi !khaisa a dîhe, soab aib ge Mataliba ge !eream, ǂgaoǀkhādi ai ra dīǀoaǀoa, !gōsase ǂguro !ǂnās ase om-e ra ǁama khoen hîa hōǁgās ǁgauǁgauna ūhân hoana. NHEs omdi !aroman ge ǂganamsen-aona ǁkhâkorobe hōǂgās âna N$20 000 ai nî hâ, ǁnāpan ǀhûǁare hâse ra ǁama khoena ǀhaob ai N$ 30 000 xa a !nāsa hōǂgāsa ūhâ tidese. ǁNān hîa a sîsenon soab aib ge Mataliba ge mî NHEs nē ǁaeb !nâ hōǂgā-e ūhâ tama hâ khoena !khōǂgā tama hâsa. ǂGanamsenaona xu ra ǂgaoǀkhāhe, ǁîn mātare-oas ǁkhāsib !nâ nî hâsa amaga.