Omupresidente gwoshilongo Netumbo Nandi-Ndaitwah mehuulilo shiwike okwa li a talelwa po komupresidente gwongundu Namibia Economic Freedom Fighters Epafras Mukwiilongo osho wo Elenga enene lyelelo lyopamuthigululwakalo lyOvaherero Hore Riruako.
Aaleli mboka oya li ya talelepo omutse gwoshilongo esiku limwe poompito dha yooloka osho wo nomatompelo ga yooloka.
Sha ikolelela komushangwa gwa pitithwa kombelewa onene yOmupresidente, omutse gwoshilongo Nandi-Ndaitwah okwa li uuvaneke oku kala ta kundathana naaleli yongundu dhopapolitika, shoka a ningi nongundu yoNEFF.
“Omupresidente Netumbo Nandi-Ndaitwah okwa thindi omuthindo gwesimano lyoku kundathana nokupukululathana osho wo okulongathana nkene oshilongo shika shina okuhuma komeho nokuyambulwa po,” ya shanga ngaaka.
Ta popi nayo ta ti, nayo aaleli ya hogololwa kaalanduli yawo, onkene onga omuleli gwoshilongo ashihe okuna okupulakena komathaneko nomadhilaadhilo taya
pewa kwaamboka ye ya hogolola.
Mukwiilongo okupitila momupevi presidente gwongundu Kalimbo Iipumbu, okwa li a pandula ompito ndyoka opo ya vule okuthikitha omadhilaadhilo gawo.
“Oya popi omaupyakadhi kombinga yuuhaku, uunamapya, elunduluko lyonkalo yombepo oya gandja wo omadhilaadhilo omaupyakandhi ngoka taga vulu okukandulwa po, na nkene tagaka lundulula onkalo uuna ga kandulwa po,” ya shanga ngaaka.
Nandi-Ndaitwah okwa taambako omadhilaadhilo nomatompelo gongushu ga gandjwa kaaleli yoNEFF, ta gwedha po wo nkene taga tsu kumwe nomathaneko ga tulwa miilonga kepangelo.
Okwa ti oonkundwa dhawo odhina ongushu nodhuuka ombinga yimwe dhina elalakano lyoku humithakomeho nokukandula po omaupyakadhi taga shunitha oshilongo monima.
Elenga enene lyomuthugulwakalo gwOvaherero Riruako okwa totha mo unene uupyakadhi wa taalela oshigwana shOvaherero, ngaashi omakondjelo gomavi.
Riruako naye okwa li a pandula kompito ndyoka opo a popye omaupyakandhi gaatalela oshigwana, opo ku talike nkene taga vulu okukandulwa po.