ONGWEDIVA – Selma Shingenge oo eli omupandi dingi meedoolopa do ko nooli unene oNgwediva nOshakati, ashiivika nawa onga “Selma the Hairdresser” okwa ti yee ohe li nyangele mwene okudilila mongeshefa ya ye yokupanda.
Shingenge okwa ti okuna odjapo yakula yo Honors degree oku dilila koshiputudilo sha UNAM, mouhongi nonghee oku li omuhongi keifano.
“Ashike nande nda deulilwa okuhonga oshiwana, odjapo yange onde i mbaanga manga hai denge omapando momitwe dovanyasha vomeedoolopa daNgwediva osho yo Oshakati naadi do popepi,” ta ti.
Okwa ti okuputuka kwaye okwa kala ha pande omutwe wa inakulu manga a li mondodo onhinhe, osho yo omitwe da vamwaina meumbo.
“Opo opo nee nda dja nde li hongela unene okupanda, fiyo handi kala ndina osalona yange mwene mOshakati omo hai ningi eshi ndi hole, shoo tashi etelenge oshimaliwa sha pama mondjato,” ta ti.
Okwa twikila kutya yee eshi a kala moshiputudilo osha kala shidjuu kuye okukala ta pande yee ta wanifa po oilonga ya ye yofikola pefimbo limwe.
“Ashike shaashi kandali lela ndina ou ta kwafange, onda kala ashike handi longo noudiinini opo ndi kale ndina sha sho mondjato,” ta ti.
Okwa yelifa kutya okwa hala okutwa ovanafikola omukumo, unene ava veli koiputudilo yopombada vaha kale ashike va landula oondjila da puka, ndele va kale yoo tave li nyangele kuvo vene unene a va vena oitalendi.
“Omunhu kutya nee oushi okupanda, okuhondja, okuninga oipanyala neemhafu ninga ashike, ponhele yoku monifa ovadali oixuna,” ta ti ngaho.