KATIMA MULILO – Mueteleli wanaha Netumbo Nandi-Ndaitwah ulizize mulangu hala kuekezeha kwa mifilifili mwanaha Namibia. Nafile mamela kuli naha imwa kozi ya kuituba haiba sicaba sipalelwa kuswalisana. Hana bulela kanako ya kutabela lizazi la bu 59 la Lindwalume mwa Katima Mulilo, Mueteleli wanaha nafitisize pilaelo kuli bayahi banaha Namibia bazwelapili kuitwanisa mwa mabasi, sicaba, lipolitiki, likeleke ni likhuta za sizo.

“Lupalelwa kutusana ni kuli luswalisane mwa kueza hande. Taba yeo ya ni filikanya kuli lwa itwanisa… Lu batu ba hamoho,” nabulezi. Nafile mamela kuli sicaba batatulule likañi kakozo ni ku ambuka mifilifili. Nafile mamela sihulu babanca ba ba kona kupalelwa ku utwisisa buitomboli bone butisize tukuluho.

Lizazi neli tabezwi mwata mutomo otwi ‘Kuyahwa fa Bundume, Tamahano ya Bukamuso Sakata’, mi sicaba nesi kamuhile kabuñata kuto amuhela mueteleli wanaha banze bazukuza ndembela yanaha mwa halimu. Sikwata sa Ndilimani ni likwata zeñwi za sizo ni zona neli tabisize sicaba. Baeteleli ba mubuso, baeteleli ba sizo, ni bayemeli kuzwelela linaha zeli bukaufi hamoho cwalo ni sicaba kaufela neba kubukani kutabela lizazi la lindwalume.

Nandi-Ndaitwah nahatelezi kuli swalisano ki mutomo wakuhula kwa sifumu sanaha Namibia, mi naize kozo ni sepo kona musumo wa tukuluho. “Sepo kona musumo watukuluho ya luna. Kwanda’ sepo, likezo zekona kulyanganisa sicaba liba teñi,” nabulezi. Lizazi neli tabezwi kuhupula buitomboli bwa lindwalume ni lindwakazi hamoho cwalo ni kulumba swalisano ya baeteleli basizo.

 Muzuzu wa kukuza no mamezwi kutompa nyandi Sam Nujoma, muetapili wapili wanaha Namibia hamoho ni ndatahe lindwalume ni lindwakazi zelu siile. Mueteleli wanaha hape nalemusize kuli mubuso uka yaha mabita aponiso kwa Matotaeti a Lindwalume, kutompa limembala za Swapo za pili Tobias Hainyeko ni Brendan Simbwaye, bao litupu za bona ni mabita abona halisika bonwa kutisa kacenu.