KATIMA MULILO – Mueteleli wanaha Netumbo Nandi-Ndaitwah Labubeli nakile alumba kuyandululwa kwa mikwakwa mwa sikiliti sa Zambezi, mi naize kusupeza kuhula kwanaha Namibia kuzwelela tukuluho.

Hana bulela kanako ya kutabela lizazi la lindwalume ni lindwakati, naize kuyahiwa kwa mikwakwa ya tala mwa Katima Mulilo kungungahanya naha Namibia ni linaha zeli bukaufi, kitulo yene sakonwi kunahanwa ka silimo sa 1990.

“Zwelopili ki musipili. Naha hailukuluha, nekusi bunolo kutaha kwa Katima Mulilo, nekufumaneha feela mikwakwa ya cebwecebwe. Kacenu, kuzwa kwa museto wanaha South Africa kutaha kwa Katima Mulilo, mutu ukwaeza mwa mikwakwa ya tala,” nabulezi.

Mueteleli wanaha naize sikiliti sa Zambezi se si ngunganyizwe kwanaha Zambia, Angola ni Botswana ka mikwakwa. Naize kono hakutoloki kuli matata kaufela mwasikiliti atatuluzwi. Nasupile kuli miyaho ya tuto, makete, lisebelezo za mezi ni mulilo wamagesi lisa tokwahala. Nasepisize kuli kamaiso yahae itamile kutaleleza lisepiso za bona.

 “Kakuba mubuso, luitamile kumbweshafaza babanca, kuzwisezapata kuipeleka, kuikabela limbule, nikutahisa misebezi hamoho cwalo ni kulwanisa bulyangelino,” nabulezi. Naekelize kuli buitamo bo, bulukela kutompa baana ni basali bane baitombozi bupilo bwabona kulwanela tukuluho ya naha. Kutabela lizazi la lindwalume nekusindeketilwe ki manzwi, mikanga, lipapali za sizo ni kucaula kwa Sisole sa naha Namibia.

-Nampa