Omalelo opamifyuululwakalo okwa tanga Omukokolipresidente Sam Nujoma kutya okwa li omuleli woshili a fimaneka omufyuululwakalo neenghulunghedi. 

Chief Oswin Mukulu welelo laMbalantu okwa ti Nujoma okwa li kaume kOlufuko. 

“Pefimbo Olufuko la totwa po Omukokololipresidente okwa kala e li ekwetele komesho,” ta ti. 

Mukulu okwa ti alushe ngeenge ku na oshivilo shOlufuko osho hashi ningilwa kOutapi, Nujoma okwa li e hole okuya kOlufuko nokutala ovafuko eshi va fewa. 

Okwa hokolola ta ti Nujoma okaume kaye koshili nova kala ve na ekwatafano liwa okudja pefimbo lekondjelomanguluko. 

“Otwa kanifa ependafule, xe yoshiwana shaNamibia, omulumenhu a longa noudiinini okutuetela emanguluko,” ta ti. 

Okwa didlikwa Nujoma kwa li e hole ovanhu tava landula eenghulunghedi dOshiwambo omo unene kwa li e li omhinge noushenge nosho yo novakainhu ovo ve li ninga ovalumenhu okulundulula oushitwe wavo. 

Omupopiliko welelo laUkwanyama nku li omunashipundi woonakulwa vakulu moshitukulwa shaHangwena Andrew Naikaku okwa ti okwa shakeneka Nujoma omudo 1974. 

Okwa ti konima eshi Namibia a manguluka Nujoma okwa popya ta ti keshe elelo li na Ohamba yalo ya xulifa naki konge Ohamba yokuwilika elelo keshe moshilongo. 

“Okudja opo Nujoma okwa kala nokuyambidida omalelo opamufyuululwakalo nokulongelakumwe,” ta ti. 

Naikaku okwa hokolola ta ti Nujoma kakwa li e hole eembulu dokatongotongo odo kwa li tadi hepeke Namibia pefimbo loita. 

“Pefimbo kwa li tu li kondje yoshilongo mekondjelomanguluko Nujoma okwa li e hole oku tu lombwela tu longe nondjungu tuha sholole okulwifa eembulu,” ta ti. 

-fhamalwa@nepc.com.na