Eba Kandovazu 

President Nangolo Mbumba nkera ngurangura kakadingwire pembo lyanakufa Presidente gontoterwa nakufa Presidente Sam Nujoma, ogu kadogorokere momapeu gana puko masiku. Apa nye kahuyungisire Mukada nakufa, ogu gakere asi mukada president Kovambo Nujoma, Mbumba karuganesere nonkango dehengagwido, omu kamutanterere age kumwe novanekoro asi awo kapisi velike vana kara mokulira Nujoma. 

‘’ Ose kuna wiza kwazinyetu tuyatwe nongoro komeho zendi nokuyamutantera asi kapisi gelike dina gumu nomfa edi. Onane, kapisi nyonelike , ose natukara kumwe none, ose natukara kumwe novanekoro,’’ yimo ana kutanta Mbumba. 

Age kapandwire vahakuli ava kavakere tavahakura Nujoma, komehoa akatusige. ‘’ Esi yiso siruwo simwe esi vana kututura nye momakonakone gana kutanta asi tudive nyamwetu asi ose vakwayita wousili. Nampili ngapi natukara nomahodi gomanzi unene, ose twahepa kurugana eyi natuvhura kurugana, omu natufumadeka epanda lyetu, muntu ogu gatupitisira dogoro tuyagwane emanguruko. Ose tuna pumbwa nye ngesi kukahingira asi nompitisili mepangero nokukatara nye asi yinke yina hepa yokurugana mungura, nomazuva ogo gana kuwiza,’’ yimo ana kutanta Mbumba. 

Mukurona gepangero simpe kapandwira nakufa Nujoma omu gakara nomukumo ganinkisa vaNamibia wokulisiga siga vanafarama ndi yinke avarugana vakare vakwayita siruwo sokukondjera sirongo esi sikamanguruke. ‘’ Ogu yige mugara ana kara asi ngano kapi gakereko ngesi ose simpe moukoloni tuna kara. 

Age gumwe gatutumine ose vanona tuze kosure, age kapi gadivara kugwanekera kumwe nose nokutupa mukumo asi tutengure simpe tuyakondje. Owo vayirugana ngoso masanseko ngavagatjanga,’’ yimoana kutanta Mbumba. – Nampa