O-2026 oyo mbongarero yombazu kutja ovanane vombazu ve worongane ve twe ourizemburuka pamwe ohunga nombazu yawo oyo ndjri momatokero omanene.
Indji ondjiri onḓero, omaundjiro nourizemburuka wOndangere Ngeke Katjangua mombura ombe indji o-2026 otja tje i handjaurire mOmurari wOndjivisiro Ombaranga okuyakura ombura ombe. Ama sekamene komatokero omanene nga hungama ombazu yOvaherero nOvambanderu.
Omatokero nge za momuhoko notjiwaṋa otjini, momatokero omengi pekepeke. Kokutja nandarire kutja pe nomauhonapare omenig pekepeke wombazu mOuherero nOumbanderu ouhumandu nge ha yandja ombango ndja pwire, indu ndoovazu u nombango kaparukaze mbu u yandja kombazu. Ngunda ame u kuminine kokutja ombango u yandja koviṋa vyarwe, muvyo tjimuna oviposa mokati kotjiwaṋa nomuhoko.
Ondangere Katjangua ma tja kape norupa rwombazu momuhoko notjiwaṋa karu hendekwa poo karu yepisiwa nokutombwa mombazu okuza kozonḓiro, otukupo, omarukiro wovanamutje omana na vyarwe.
Nandarire kokutja imbi ooviṋa omauhonapare wombazu mbi wa sere okutjevera tjinga otjiungura tjawo otja kombutiro yavyo atjiri omatjeverero wombazu nomatunduuziro wayo. Wa yata moviṋenge pekepeke ombazu mu i tombwa tjikweya kombazu tjimuna ongamburiro moviṋenge aviyetatu vyonḓiro, otukupo nomarukiro wovanamutje omana pu vi mangasana omarama nu momamangasaneno womarama nga ombazu arire ndja zoorwa ngandu tji ya vaza ondondo yokuzenga kaparukaze. Tjimuna omuano orukupo mombazu nongamburiro indji ndi ku za oyondanaukiro mbi hivasana. Na wina onḓiro poo ombakero omuano mbi vi tombasana omundu o ha tjiwa kutja o ha haṋa pokati konḓiro nombakero yombazu noyo mongamburiro. Ngandu komarukiro wovanamutje omana nambano omana wautuwa onge honapara movanatje ngandu momivanda vyozonganda zozombazu ovanatje ovengi pu ve tjiukirwa nokuiisanewa omana wOvirumbu owo momivanda na kovakuru novaṱi nge ha tjiukwa.
Nandarire kokutja ozongaro inḓa za vaza ondondo ndji za vaza, ondangere Katjangua ma tja kape ya kapitwa ovanane vombazu okuya pamwe okutara kokutja ombazu mave i yamene pi nokuikotora momuhunga wayo. Otjotjiungura tjawo otjinenenene notjitenga kombanda yoviungura vyawo vyarwe ovingi pekepeke.
