Cornelia Kazeurua, omuhepundu womukonḓononene wotjiwaṋa wourunga wovinamuinyo, omuyaruke Wilfred Majora Hiambepo Kazeurua, we rihekenene komupangure okutjita ongahukiro kutja imba mba munikwa ondjo monḓiro yomurumendu we “..ave ha roro naṋi maave kamuna eyuva rukwao…”

Kazeurua wa raerere Omupangure omuṱize woruveze wotjombanguriro tjokombanda tja Tjomuise, Alfred Siboleka Omandaha kutja eye neṱunḓu re va muna ouzeu tjinene okuza konḓiro yomurumendu we mo 2012. Rutenga wa sere okupaha parwe pu ma katura omuhoko womurumendu we tji ve mu ramba ponganda. 

Pa katungirwa okapereke ketuwo rimwe rwomara eye novanatje ve ngamba mu ve ri. 

Wa raerere otjombanguriro kutja wa panduka ovanatje hamboumwe morukupo na varwe omurongo vopendje norukupo. Omuatje omuṱiṱi wari nozombura ndatu ihe tja ṱa onḓiro ombi. A raere omupangure komurungu kutja onḓiro yomurumendu we, ye ve ṱuna nomasa tjinene. 

Oviungura vyovanatje vyosikore vya uta okuyaruka ombunda tjinga aari nouzeu wokuvetumba. “Onḓiro yomuyaruke ye ndji ṱuna tjinene, tjinga tjimanga a mba hara omerizirira vovanatje, a mbi ha ri nomayeneneno okuvetumba pu pa yenene,” omuhepundu wa raerere omupangure. Na tja kanaa isire ovakumininwa imba nu tjingetjo otjombanguriro katji sere okuveṱira otjari. 

Stockley Kauejao, Matheu Kakururume na Muvare Kaporo va munikwa ondjo mokuzepa, ourunga wovinamuinyo nokukuramena oveta momurungu. Ngunda Afas Kamutjeno aa munikwa ondjo mourunga wovinamuinyo nokukuramena oveta momurungu. Omayuva tjiyeri omuronga narimuwe (11) komwueze mbumauyende, Suramazeva, omupangure, Siboleka, otji ma tjivisa omberero.