Ozombura kombanda yo-120 Onamibia ra kondwa mozongorongova mbari i yomukoka omuserandu, wina mbu tjiukwa otjOkorondona.

Ohoromende yOswapo oure wozombura o-34 mbu ye u ura okuisapo. Posi ya Oalternative Repositioning (AR) tji ya kambura ohoromende mbu mai isa po ohakahana. OAR nai ya tjanga nokurongererisa Ombungurwaveta

Kunao ohoromende yayo otji mai kondjo kutja irire ouatjiri kutja Ombungurwaveta indji i tuurunge okutjayera nokutwapo omazeva wouini wehi i yovakwatera vomahi wozonganda. 

Otja kuyo kape novakwatera vomahi wozonganda mave yandjerwa okukara nouini wehi mehi rakangamwa kaparukaze. 

Ovakwatera vomahi wozonganda mave yandjerwa porwe okuyazema ehi rotutumbo novikunwa otja koveta nowo kave nokuyandjerwa okurirandisa kovakwao vomahi wozonganda.

Monamibia mu nozosarama nḓe ri kombanda yo-200 zovakwatera vomahi wozonganda noveni vazo mbe ha turire mehi ozo ape nḓe nounene wozoheketara engete rimwe nokanḓe noine. 

Inḓa oozosarama OAR nḓu ya yenge okuzekambura nokuzehaṋena kOvanamibia poo okuzekamburira komaungurisiro kotutumbo novikunwa. 

“Ngunda Ongunḓeveta ya Namibia ai i yandjera ehi okukamburwa monḓero yotjiwaṋa, kondjambi ndja pwire, ovihoromende vyOswapo mbya kongorerasana ozombura o-34 inḓa, vya toroka nokuyakura omatanauriro inga kutja ondjambi ndja pwire i heya indji yomotjitamba.” Munao otji pe hi ya kara omakamburiro wehi kaparukaze. Ohoromende yOAR opu mai twakere kotjiriro mOndjuwo yOzoveta yomoveta, oveta ndji mai kahurura nawa kutja “ondjambi ndja pwire” mai heye tjike oyo ndji mai rire ongahuke kutja kai nokuheya kokutja “oyotjitamba”. 

Wina ohoromende yOAR mai isa po omuano mbu ri po nai womarandisasaneno wehi “womurandise omupupurukwe nomurande omupupurukwe”.