Osondoha omayuva tji ya ri hambombari komueze mbwi ombongo yongamburiro indji Ofather Tjijombo St. John’s Apostolic Faith Mission otji ya harere omurise indi tji ya twirisire Oarch Mbitjopa, nguri omuhonge wayo omunenenene mOnamibia aihe.

Nguri Julius Hoveka ape ozombura mbari nokuhina omuhonge omunenenene kombunda yonḓiro yomuhonge wayo omunene nomuute wombongo ndji, Petrus Daniel Katikisa Tjijombo, ngwa ṱire mo 2023. 

Omatwirisiro yari Osondaha tji ya ri yetano kombunda yovitjitwa vyomayuva yetano okuza tji ya ri etenga ndari romapatururiro kotjiveta yovitjitwa vyomatwirisiro mbya paturukire nongurova yongumbiro Omandaha tji rari etenga komueze mbwi. 

Nomayuva ingo warwe ongurova aihe aku kongorere ozongurova zozongumbiro. Ngandu Oroviungura tji ya ri hamboumwe ongumbiro tji ya tjirire ko omuhuka omunene.

Oroviungura indo wina tji ya ri hamboumwe ombongo yari novitjitwa pekepeke vyongamburiro tjimuna omaserero wounatje ondaya na wina mu mwari otjimbumba tjozohiva pu tja kawondjere momivanda vya Katutura tjazumba ape kongorere otjiungura tjongumbiro otjimbumba tjozohiva wina mu tjari norupa. 

Ongumbiro yomaveruriro na wina ozombinika okuza kozombongo zarwe.

Osondaha ondari orini rotjiungura tjomatwirisiro ovimbumba novimbumba tji vye rikwambere kombongo. 

Muvyo mu mwari otuhindo twombongo okuza komahi omararanganda tjimuna Otjauana na South Afrika. 

Vovahonge mbari norupa orunene motjiungura tjomatwirisiro. 

Omuhonge omunenenene wombongo tja yandjere oruyano moveta komurungu yohahende Eva Shifotoka nu omuhonge omunenenene wombongo tja zu nokuhikikwa a haamisiwa kotjihavero tje. 

Tji tjiri otjihavero tjopokati kotuveze uriri ngandu ombongo tji ye mu pahere otjihavero tji tje mu pwire.