GUINAS- Omuhoololwa kansela waGuinas, Moses Khumub wongudu yoSwapo okwa popya ta ti otava twikile okukala nombili nonelongelokumwe nomumwainamati Fransiskus Khumub ou kwa li tava kondjifafana naye momahoololo oukasnela.
Moses okwa findana omahoololo oukasela nomawi 1407 omanga Fransiskus oo a li a kalela po ongudu yoLMP a dja mo nomawi 612. Omahoololo okwa ningwa Etitano koshikandjohoololo sha landula efyo lakansela waGuinas Elia Martinus (51), oo a xulifa omudo wa dja ko.
Oshikandjohoolo shaGuina osho shimwe sha didilikwa shi na omwaalu muhapu woshiwana shovayelele moshilongo.
Ovanhu 40331 ove li shangifa oukalata vomahoololo koGuinas, ashike ovanhu 2019 va kufa ombinga mokuhoolola. Moses okwa popya ta ti ota longa noundju okuyakula nawa oshiwana noshoyo okuyandjaneka omayakulo. Okwa weda po ta ti ombelewa yaye otai ka longela kumwe noshiwana nghene ve na okuyambula po oshikandjohoololo shavo.
“Ohandi ka kondjifa onghalo yokuhe na oilonga kovanyasha molwashi onda didilika ovanyasha vahapu tava dengwa koluhepo molwashi vehe na oilonga,” ta ti.
Moses okwa yelifa ta ti ka longela kumwe neeministeli da yooloka ngaashi ouministeli wounamapya, omaudano noshoyo vomangeshefelo opo va yambidide ovanyasha okutota po eengeshefa davo noikunino younamapya.
“Osha fimana ngeenge ovanyasha tava tote po eengeshefa davo molwashi otashi kwafela okulwifa ondjala nokueta po oyuuyemo yoshimaliwa,” ta ti.
Okwa ti ota ka twikila neepoloyeka domoshikandjohoololo opo kansela nakufya Martinus a xulifa. Pefimbo oshiwana tashi hoolola ounona voshiwana shovayelele hava di kOshivelo ve li peedula 17 ova lombwela Kundana tava ti ova fiye po ofikola molwashi tava dengwa koluhepo lokuhe na oikwafifohongo.
“Onda xulifa mondodo 9 molwashi ofikola oi li kokule. Ka pena ou ta yambidida nge shaashi ka ndina ovadali vange,” Kalux Isaacs ta ti. Okwa pula omuhoololwa kansela opo a kwashipaleke kutya ota ka yambidida oshiwana shovayelele shi kale mofikola molwashi ehongo ola fimana. Helena Namaseb weedula 68 wokomukunda Ondera okwa ti pofikola Ondera Combined School opena omwaalu muhapu vovanafikola va fiya po ofikola. “Ovanafikola ova pumbwa omuhandjofikola molwashi otashi tu ovanafikola omukomo wokukala mofikola notashi eta oidjemo iwa kexulilo lomudo,” ta ti. Moses okwa nyamukula ta ti ombelewa yaye otai ka longele kumwe nombelewa yaye minista wehongo opo eefikola dihe na omuhandjo di kale da tungilwa omihandjofikola. “Ohandi ka longela kumwe nomahangano a yooloka nokukonga omakwafo opo tu dule okuyambidida ovanafikola va kale mofikola. Otwa pumbwa oshiwana sha longwa moshikandjohoololo shetu,” ta ti.
Okwa weda po ka pena okaana ta kakala momapandaanda pefimbo lewiliko laye shaashi ota ka kwashipaleka kutya ounona ova ya kenongelo. “Ohandi ka longela kumwe novadali nokuvaxwaxwameka kombinga yefimano lehongo opo va twe ounona vavo omukumo vaye kofikola,” ta ti.
Pefimbo a kwatafana naKundana Fransiskus okwa ti kena oupyakadi naMoses molwashi okukondjifanana papolitika itashi ti kutya ovanhu na va ninge ovatondi.
Okwa koleka ta ti omahoololo okwa ningwa pauyuuki ashike okwa kengelelwa kovanhu ovo kwa li ve mu landula pefimbo loshikonga shaye shomahoololo molwashi ina ve mu hoolola.
“Ova ti otava ka hoolola nge mboli oipupulu. Okwa li ndina omukumo kutya ohandi findana omahooololo molwashi okwa li ndi ovayambididi vahapu,” ta ti.