OSHAKATI – Oyendji oya tala ko esiku ndika lyonena tali ithanwa lyohole hali dhimbulukwa ashike komukiintu nomulumentu ye li mekwatathano lyopahole, ihe shoka kashi li mondjila nani.
Esiku ndika ohali dhimbulukiwa aluhe momasiku 14 Febuluali gomumvo kehe.
Sha ikwatelela kaapyokoki oshowo mboka ye na ontseyo yohole, oya shanga kutya esiku ndyoka olya nuninwa kehe gumwe, okuulukilathana nkene ye holathane, ihe kashi na nuukwatya.
Mboka ye na ontseyo oya fatulula kutya ohole uukwatya hau kala pokati komuntu nomuntu omolwekwatathano ye na.
“Ohole ohayi tamekele maanegumbo yoye, ngele owa tseya uukwatya wohole, nena oto vulu okuhola kondje, po opo mpoka aantu haya ka mona ookuume kawo oshowo ookuume yopaihole oshoka oya mono uuwanawa nesimano lyokuholathana,” ya fatulula ngaaka.
Kundana mehuliloshiwike okwa li a yi moonkundathana dhopangodhi naantu ya yooloka, aayihomboli oshowo mboka ye li momakwatathano gopahole naalumentu nenge naakiintu, opo ya tye ko sha kesiku ndika.
Oyendji oya gandja omaiyuvo gawo nkene yu uvite ko esiku ndika hali dhimbulukiwa momukalo gokuulikilathana ohole.
Sonia Aimbili okwa ti oshigwana osha uva ko ohole epuko.
Okwa fatulula kutya ohole omaiyuvo omawanawa pokati komuntu nomuntu.
“Ohole ohayi vulu okukala pokati kokanona nayina nenge nahe, aamwayinathana, aashiinda oshowo ookuume,” ta fatulula ngaaka.
Ta ti, esiku ndyoka oyendji ohaye li dhimbulukwa noku li dhana ashike naamboka ye li momakwatathano nayo gopahole, ihe hasho shi na okukala ngaaka.
Omusita gwongeleka Immanuel Ministry Church mOshakati, Pendapala Shikongo Immanuel, okwa popi kutya ohole nayi ziilile aluhe momagumbo.
“Kehe gumwe nena na lombwele kehe ngoka e hole kutya oku mu hole ngiini noku mu hole shi thike peni,” ta kumagidha ngaaka.
Ta ti, okwa ndhindhilike kutya oyendji ohaya hololele aantu ohole uuna ya kana ko, omanga sho ya li momwenyo kakwa li ye li mekwatathano lyasha.
Ta pula kutya ongiini to hololele nakusa nkene wu mu hole ye ke ku uvite?
“Oshigwana nashi lundulule etashi kala mombepo yohole yoshili,” ta kumagidha ngaaka.
Silas Natanael ngoka ta ti okwa kala omimvo 21 mondjokana okwa ti esiku kehe kuye esiku lyohole.
“Omukulukadhi gwandje ohandi mu uvitha nawa kehe esiku tandi zi mo megumbo nenge tandi ya mo, momikalo dha yooloka,” ta popi ngaaka.
Ta ti, okuuvitha omuntu ohole itashi ti ashike oku mu pa omagano gopeke, ihe oku mu ulukila nkene a simana kungoye.
“Nonando ku na oshimaliwa okulandela omuholike goye okaleke nenge shoka e hole esiku ndyoka, oto vulu oku mu uvitha nawa momukalo gumwe itaagu longithwa oshimaliwa,” ta popi ngaaka.
Selma Nickodemus moonkundathana naKundana okwa ti esiku lyohole nali simanekwe ashike ngaashi lya tulwa po, ngaashi omasiku omakwawo haga dhimbulukwa.
“Esiku ndika lyonena onda hala okupewa sha oshiwanawa shoka tashi nyanyukitha omwenyo gwandje, opo nangame ndi mone wo kutya ondi holike,” ta po pi ngaaka.
Ta ti, ite shi uvu ko nando, ngele esiku ndyoka olya piti inaa pewa sha okuza komuholike gwe nenge kukuume ke kopothingo.
Maria Simion okwa ti okwa ndhindhilike kutya esiku ndyoka ohali vulu okutopola yamwe, oshoka ngele inaya pewa omagano oyu uvite kutya kaye holike.
“Shoka osha puka, nena ngele omuholike goye ke na sha na kuthe peni? Shoka kashi shi ohole yashili,” ta popi ngaaka.
Shapwanale Ndjoba okwa ti esiku ndyoka lyohole ohe li dhimbulukwa pamwe naakwanezimo ye, ookuume ke oshowo kehe ngoka e hole.
“Esiku ndyoka olyokuulikilathana ashike nkene mu holathane, kashi na kutya olye,” ta ti ngaaka. Ndjoba okwa ti esiku lyohole olyi na okukala lyu udha ombepo yombili.
Komalungula oku na yamwe ya ningi esiku taya taambathana omapopyo kombinga yesiku ndika lyohole, noyendji oya shanga kutya ngele omuholike goye ine ku pa sha esiku ndyoka, nena ekwatathano lyawo lyopahole kalyi li nawa.
Ohole natango ohayi hololwa pamuzalo gomalwaala gomaludhi gatatu. Omaludhi ngoka ongaashi olwaala olutokele, olutiligane oshowo oluluudhe.
– vkaapanda@nepc.com.na