Okudja omudo 2022 fiyo oneudo, moNamibia omwa lopotwa oibofa 4 835 i na sha nokunyateka omadina ovanhu nomalundilo.

Edi oda popiwa onghela kukakukutu komatanga opolifi Inspector General Joseph Shikongo pefimbo loshikonga shokuyandja ehongo kombinga yelongifo lomapandja okomalungula.

Oshikonga osha ningwa koWindhoek koshiputudilo shoNUST. Elalakano loshikonga eshi okuyandja ouyelele osho yo okuhonga oshiwana. Shikongo okwa ti natango okudja omudo 2022 okwa lopotwa yo vali oibofa 165 yovanhu tava longifa omadina ovanhu okulonga oumbudi.

Kakukutu okwa hokolola ta ti natango okudja omudo oo tuu oo okwa lopotwa oibofa 9 039 okupitila komalungula.

Omanga oibofa 11 990 oya lopotwa i li kombinga yokatoo koumbudi omo ovanhu va kanifa omaliko avo mwa kwatelwa oshimaliwa. Shikongo natango okwa ti okwa lopotwa oibofa okupitila komalungula ngaashi yoludi lokushindafana, okutuka ovanhu osho yo okuxwaxwameka ounona kombinga yoipambele yopaixulo.

“Oibofa aishe oyo ohai eta omunhu a kwatwe po ndele ta pewa ehandukilo lopaveta,” ta ti.

Shikongo okwa ti okupitila moshikonga eshi opolifi otai twikile okuxwaxwameka ovanafikola osho yo ovalihongi koiputudilo yopombada ya yooloka opo va pewe ehongo nghene ve na okulongifa omalungula. “Natango opolifi otai ka yandja ehongo koshiwana koitukulwa aishe yomoshilongo. Osha fimana opo omunhu keshe a kale a pewa ehongo eli, “ ta ti.

Okwa weda po ta ti opolifi otai twikile okulongela kumwe noshiwana osho yo omahangano omakwatafano opaungomba okukondjifa elongifonai lokomalungula. “Natu longeleni kumwe. Natu longifeni omapandja okomalungula okuyandjaneka ouyelele osho yo okulongafana,” ta ti. –fhamalwa@nepc.com.na