Auleria Wakudumo 

Omukulunhu wopolifi moshitukulwa shaShana, Commissioner Naftal Lungameni Sakaria okwa holola kutya omwaalu woibofa ya pwa okupangula owa shuna pedu okudja mo2023 fiyo oneudo. 

Sakaria okwa ti opolifi oya pondola okushunifa oibofa ei pedu molwomapekaapeko nokulonga noudiinini moilonga yavo. 

Edi okwe di holola pefimbo ta patulula pambelelwa oNew Era Operation nokudjaleka ovapolifi 17 ovo va yelwayelwa eembadi dipe Etine meembonge dakula dopolifi mOshakati. 

“Mo2023, oimbuluma ya lopotelwa opolifi oya li po11 384 omanga o2024 ya li po9 208. Eshi otashi holola kutya oibofa oya shuna pedu shaashi opolifi ya pondola okulonga oilonga yayo,” Sakaria ta ti. 

Sakaria okwa holola yo kutya neudo oibofa ya pwa okupangulwa oya shuna pedu neepelesenda 5. 

“Ope na ovanhu tava ti kutya opolifi itai longo oilonga yayo ashike paushili woovene otai twikile okukwashilipaleka kutya oibofa oya pwa okupangulwa noimbuluma oya shuna pedu moshilongo shetu,”Sakaria ta ti. 

Pefimbo ta djaleke ovo va yelwayelwa eembadi, Sakaria okwa indila ovapolifi opo va twikile okulonga noudiinini moilonga yavo. 

Ovapolifi 12 ova djalekwa eembadi douSeargent 1 osho yo Seargent 2 omanga vane va ninga ooWarrent naInspector umwe. “Keshe apa to lihange to longo, eshi wa pumbwa okuninga okulonga noudiinini. Fye ohatu ku tofa mo ngeenge to longo noudiinini nokutuma edina loye kukakukutu kopolifi, Inspector General Joseph Shikongo opo u dule okuyelwayelwa nokutulwa ponhele opo twa tala kutya oto dulu okulonga,” Sakaria ta ti. 

Sakariaokwatwaomukumo ovapolifi ovo inava yelwayelwa kutya shavo opo tashi ya nova pumbwa ashike okulonga noudiinini. 

-wakudumoauleria@gmail. com