Taimi Haihambo 

Omukulunhu wopolifi moshitukulwa shaShana okwa hololela ovakwashiwana vomoshitukulwa eshingo lavo loihauto manga ve li koshi yodungo. 

Edi okwe di popya pefimbo a li a hanganifa ovakalimo vaKaku Etitatu, omo a holola enyeme kovakalimo tava shingi va kolwa. 

“Moule womwedi umwe otwa lopotelwa nokupatulula oibofa ya fika po45 yovanhu va tulwa moipandeko tava shingi ve li koshi yomalodu,” Sakaria ta ti. 

Okwa ti eshi osho shi li osheetifi shomuimwe oyo ya eta opatolola yopolifi moshitukulwa i kale ya nyaa keonga. 

Meemwedi da dja ko vati opolifi ohai dulu ashike okukala ya patulula oibofa yoludi e li ngeenge oihapu oi li ine ile itano ndele paife otai londo neenghono. 

“Okushinga koshi yodungo oko taku etifa oiponga yoihauto ihapu neenghono, notwa hala oiningwanima yoludi eli i kale ya tulwa oshitwa,” omukulunhu wopolifi moshitukulwa ta ti. 

Lungameni okwa holola yoo enyeme laye kovapolifi ovo hava futwa mo eembubo kovanhu va kolwa ndele tava efiwa va ye. 

Okwa ti omunhu ngeenge okwa kwatwa a hangika e li koshi yodungo kopolifi, na tulwe ashike moipandeko ndele ta futu ehandukilo laye loN$ 8 000.00, opo shi dje po she mu luluma yee ehe shi ninge vali. 

Opatolola yopolifi oi li pokati koitukulwa itatu yomonooli, Ohangwena, Oshana osho yo Omusati noi li koshi yedina Omushangwena, edina olo la kwatela mo oitukulwa aishe. Opatolola oya tamekele Omaandaxa notai xulu mongula tai xuunine moshitukulwa shaHangwena. 

-taimihaihambo2000@gmail.com