Omukulupe weedula 68 okwa fiwa pomutenya konima oikombo yaye itano ya vakwa koshinyongo ndele tai dipawa nokulondekwa motuwa. Oshiningwanima osha ningwa mexuliloshivike komukunda Uukweedhidhi moshitukulwa shaShana efimbo loufiku.

Oikombo aishe oikadi noi li pongushu yoshimaliwa oN$5 000.

Omupopiliko wopolifi moshitukulwa shaShana Inspector Frieda Shikole okwa koleka oshiningwanima eshi.

Opolifi oya hokolola tai ti oikombo oya vakwa koshinyongo pefimbo omukulupe kwa li a kofa. Otaku hokololwa kutya mongula eshi kwa sha omukulupe okwa ya koshinyongo ashike okwa hanga eemhadi da enda okudja koshinyongo fiyo omoixwa.

Omukulupe ou okwa didilika kutya mboli oikombo yaye ei ya kula itano kai mo moshinyongo. Opolifi oya hokolola tai ti omukulupe okwa landula eemhadi fiyo omoixwa omo a hanga omalola otuwa. Otaku hokololwa kutya kalyamupombo ou okwa londeka oikombo motuwa yaye ndele ta faduka po.

Fiyo onena kape na oikombo ya monika, po kape na omunhu a kwatwa po.

Opolifi otai indile moshiwana kwaau e na ouyelele kombinga yomulumenhu ta landifa ombelela yoikombo ndele ke na eembapila opo a kwatafane nopolifi keshe i li popepi.

Okwa didilikwa oumbudi woimuna wa londa unene pombada monooli.

Ovanhu paife ohava vake oimuna ya akwao ndele tava ka landifa okapana.

Opolifi oya ti osha nyika oshiponga ngeenge omunhu ta landifa ombelela momapandaanda ndele ke na omikanda kutya ombelela oya dja peni.

-fhamalwa@nepc.com.na