Omulumenhu weedula 33 okwa kwatwa po eshi vati a kufa odopi ndele ta denge nokutatula omakende ondingosho yedina Wizzy Man i li mOngwediva. Oshiningwanima osha ningwa Olomakaya efimbo lomutenya pondingosho. 

Omupopiliko wopolifi moshitukulwa shaShana Seargent Victor Valde Nghilengwa okwa koleka oshiningwanima eshi. Opolifi oya hokolola tai ti omufekelwa okwa hanga omivelo dondingosho da pata, nonande okwa li mu na ovanhu meni.

Okwa tameka okutanguna novanhu ovo kwa li tava longele poshivelo.

Opolifi oya hokolola kutya omulumenhu okwa lombwelwa kutya mondingosho ita mu yi ovanhu shaashi omwa pata. Okudja opo okwa kufa odopi ndele ta denge omakende omahalasha ondingosho fiyo taa fi.

Opolifi oya weda po kutya natango omulumenhu ou okwa tatula omuvelo wehalasha wondingosho.

Omakende nomuvelo kumwe oku li pongushu yoshimaliwa oN$10 000.

Omufekelwa ota holoka momhangu nota pangulilwa oshibofa shokulongela ominyonena omaliko ovanhu.

Opolifi oya kumaida oshiwana opo shi liufe komilandu da tulwa po koovene veendingosho shaashi okulongela omunyonena omaliko ovanhu kaku shi ekandulepo lomukundu.

-fhamalwa@nepc.com.na