Auleria Wakudumo
Metalululoveta lipe kombinga yeteyohombo, oikundaneki itai ka pitikwa vali okukundaneka oibofa yeteyohombo loohandimwe. Etalululo lipe la pita ola holola kutya oikundaneki otai dulu okupatululilwa oshibofa shoimbuluma ngeenge ya andjakaneke ouyelele wanakutula mo eindilo leteyohombo kakele kouyelele wanuninwa omapekapeko, wa pamba olopota yoveta, ile ngeenge oikundaneki ya pewa oufemba komhangu.
“Oohandimwe navo inava pitikwa okuandjaneka ouyelele tau tumbula kondadalunde edina, ile oukwatya woohandimwe tava teya ohombo, okaana ile eembangi da kufa ombinga moshinima eshi. Omhangu otai dulu okupitika oshibofa shi pwilikinwe koshikololo kwaavo va pula epitikilo eli,” oveta ya fatulula.
Oveta oya yelifa kutya keshe ou ta ka tauluka oveta ei ile ine liufa komalombwelo ota ka pewa ehandukilo loshimaliwa inashi pitilila N$100 000, ile okuya konima yokakuma oule weedula inadi pitilila nhano, ile aishe poshikando (oimaliwa nokuya modolongo) she likwatelela koukwatya woshibofa.
Eteyohombo la ninga ombilixa paife. Lwotete mondjokonona yaNamibia eteyo lohombo la ningwa ombilixa. Ohahende Kadhila Amoomo oya holola kutya eteyohombo ola ningwa ombilixa shaashi vati okupwilikinwa oko kwa li haku ningilwa komhangu yakula paife otaku ningilwa yoo momhangu yamagestrata.
“Okwa ningwa yoo ombilixa shaashi ovakwashiwana otava dulu okulikalela po voo vene nonande ou a hala ohahende natango ota dulu ngoo oku i longifa,” Amoomo ta fatulula.
Amoomo okwa holola ta ti ova teelela elondo leteyohombo moshilongo. Amoomo okwa limbililwa komalelo opamifyuululwakalo osho yo eengeleka eshi inadi ninga nande omunyanyo wopambili ile di holole omadiladilo ado kombinga yoveta yeteyohombo ya lundululwa.
“Osha hala kutya ohombo inai fimana vali moshiwana ngaashi kwa li ya fimana nale,”Amoomo ta weda po. Amoomo okwa ti omunawino Emile Durkheim okwa holola ta ti opo ovakwashiwana va xume komesho, ova pumbwa oveta ya kola i li moilonga.
“Osha yela kutya epangelo ponhele yokukoleka oveta yohombo, otave i teya po vali,” Amoomo ta ti.