OKONGO – Ombelewa yoshikondo shomadu i li koshi youministeli wounamapya moshitukulwa shaHangwena oya tameka okukufa po eedalate komakove ovakwashiwana shaashi da tulwa po dihe na epitikilo. 

Etivali ova tameka komukunda Okambali moshikandjohoololo shaKongo, notava ka twikila komikunda da yooloka. 

Ovanyasha ve dulife 50 va dja kehangano lokukuta ovanyasha loNational Youth Service okwa twalwa kOkongo nelalakano loku ka vatela okuhanauna po eedalate.

Opolifi nayo oya twalwa konhele yeedalate tadi hanaunwa po opo i kwashipaleke kutya eameno opo li li. Oovene veedalate tadi hanaunwa po kakwa li va holoka shaashi inava hala okuya oilonga yepangelo moshipala.

Omunashipundi mOhangwena koshikondo shomadu, Wilhelmina Shakela oye kwa li e kwetele komesho oilonga yokuhanauna po eedalate.

Okwa yelifa ta ti okwa teelelwa omakove 22 e na okuhanaunwa po shaashi ovanhu ina va pewa epitikilo lokukala ponhele opo.

Shakela okwa ti eedalate odi na okukufwa po okudja omafiku 17 fiyo 22 komikunda da yooloka mOkongo. “Ovanhu okwa li twe va shangela omikanda kutya nava dje po peenhele opo shaashi inava pewa epitikilo ashike inava hala okupwilikina,” ta ti. Okwa ti peenhele opo pa tulwa eedalate oda nuninwa oulifilo. “Oshiwana osha lopotela ombelewa yetu tashi nyenyeta shaashi shihe na onhele youlifilo,”ta ti.

Shekela okwa kumaida ovanhu opo vaha tule vali eedalate komakove vehe na epitikilo.

“Oshiwana nashi landule omilandu domondjila ngeenge sha hala omadu ndele hakulikufila edu keenghono ile pamukalo woumbudi,” ta ti. Popyeninawa Djeimo e li omukalimo womukunda Okambali, okwa hokolola ta ti paife okwa hafa eshi eedalate da dja po shaashi kakwa li ve na apa tava lifa oimuna yavo. -fhamalwa@nepc.com.na