Auleria Wakudumo
Ouministeli wouhaku nonghalonawa owa holola kutya ovakwashiwana vamwe inava hala omaumbo avo a pombelwa molwaashi va itavela kutya eenete deemwe odo tadi dulu okukelela omukifi waMalaria shi dulife pombela.
Sha landula eshi Minista wouhaku Dr Esperance Luvindao a shiivifa kutya ouministeli ouna ounghundi okupombela omaumbo, Omukulunhuwiliki mouministeli Penda Ithindi okwa shiivifila Kundana kutya vamwe ovena natano eitavelo loshikulu shonale kutya eemwe ihadi fi vati kokupombela.
“Vamwe ova hala ouministeli wu kute ovanhu vopomidingonoko davo ovo va kutwe nokupombela momaumbo avo. Omanga vamwe ohave li patele momaumbo ngeenge va mono ovanambelewa vapombela,” Iithindi ta holola ngaho.
Nande ongaho, ouministeli otau twikile okupombela omaumbo unene moitukulwa omo mwa tukuka omukifi woMalaria ngaashi Ohangwena, Zambezi oshoyo oshitukulwa shaKavango.
Ithindi okwa holola yo kutya ouministeli otau ningi omakwatafano novaleli vomifyuululwakalo, oshiwana, ookansela moikandjohoololo op ova yandje ehongo moshiwan kombinga yapombela.
“Ouministeli otau ka yandja yo omahongo epukululo kombinga yomutoto wapombela,” Ithindi ta holola ngaho.
Ithindi okwa holola kutya ouministeli otau twikile okuyandja omayakulo efike pamwe koitukulwa oyo ya tukuka omukifi waMalaria. Ouministeli owa ti ouna oihauto ya wana okuya keenhele adishe odo da dumwa dina omukifi waMalaria opo uha tandavele oshilongo ashishe.
Pehovelo lomwedi ou, minista wouhaku okwa li a pitifa omukanda oo wa holola etukuko lomukifi womalaria moNamibia.
Luvindao okwa holola kutya okudja mulotete fiyo 25 Januali neudo, oshilongo osha didilika omwaalu wu fike po 8 760 momukifi wamalaria. Eshi osha holola eyo pombada leepelesenda 68 domukifi womalaria okufaafanifa nomudo waya.
Oipangelo oya tambula ovanhu 604 ovo ve na omadidiliko omalaria nomafyo 11 okwa lopotwa molwomukifi ou.
Ouminsteli owa didilika oipangelo ya hanga po 20 oyo ya mona ovanhu ovo vena omadidiliko omukifi ou. Oipangelo ei ongaashi: Andara, Nyangana, Ncamagoro, Nkurenkuru, Eenhana, Engela, Okongo, Grootfontein, Katima Mulilo, Rundu, Tsumeb, Otjiwarongo, Omuthiya, Tsandi, Outapi, Okahao, Opuwo, Oshikuku nOshakati.
-awakudumo@nepc.com.na