Ngoloneya woshitukulwa shaShana Hofni Iipinge okwa ti okuudite etumba molwashi oimbuluma moshitukulwa shaye oya shuna pedu paife mokufafanifa nomudo wa pita.
Okwa ti oimbuluma oya shuna pedu neepelesenda 12% osho tashi ulike kutya opolifi otai longo nondjungu okukandeka oimbuluma moshitukulwa. Edi ngoloneya okwe di popya
Etitano pefimbo kwa li ta yandje omushangwahokololo kombinga yonghalo yomoshitukulwa shaye.
Iipinge okwa ti neudo moshitukulwa omwa lopotwa oibofa 39 yovanhu va kwatwa onghonga, nosho yo oibofa 130 yomahepekafano omomaumbo. Ta ti oku weda kumwe omivalu odo, noku di yeleka nomudo wa pita, otashi ulike kutya oibofa oya shuna pedu neepelesenda 12.
“Otwa didilika ashike oupyakadi wounona novakulunhu va ninga oihakanwa yomahepeko omomaumbo. Oshi li eshongo linene la taalelwa moshitukulwa shetu,” ta ti.
Iipinge okwa ti osha fimana ngeenge ovanhu tava lopota omahepeko omomaumbo pefimbo molwashi otashi kwafele ovanhu vaha ninge oihakanwa yokudipawa nokumonifwa oiponga. “Onda pandula eshi oshiwana tashi twikile nokulongela kumwe nopolifi komidingonoko davo. Elongelo kumwe nopolifi ola fimana okukandeka oimbuluma,” ta ti. Ngoloneya okwa ti ngeenge opolifi tai ningi oiongi noshiwana osho sha eta oimbuluma i kale ya shuna pedu moshitukulwa. “Oiongi yopolifi nai pule komesho unene tuu komikunda nokomalukanda,” ta ti.