OMUSATI – Ngoloneya woshitukulwa shaMusati Immanuel Shikongo okwa ti itashi ulike efano liwa eshi omivalu doimbuluma da londa pombada neudo.
Edi Immanuel okwe di popya Etivali pefimbo kwa li ta ningi evilikilo loshitukulwa.
Okwa yelifa ta ti omwaalu woimbuluma ya longwa neudo moshitukulwa shaye mwa lopotwa oimbuluma ouli po475, ta ti owa londa pombada mokufafanifa nomido mbali da pita.
Okwa ti owa wedelwa neepelesenda 34% osho itashi ulike efano liwa.
“Oimbuluma ya longwa omwa kwatelwa oumbudi woimuna nokunyekwa ovanhu omaliko avo, omahepeko oukashike kookanhu, omakwatonghonga, eenghendabala domadipao oshoyo omadipao,” ta ti.
Okwa weda po ta ti oumbudi wokuvaka po omaliko ovanhu oshoyo omahepeko omomaumbo owa didilikwa wa londa pombada moshitukulwa.
Shikongo okwa ti ombelewa yaye natango oya didilika omivalu dovanhu tava lopotwa ve li mangeleka.
Ngoloneya okwa pandula opolifi eshi tai twikile okulonga noudinini okukandeka oimbuluma no nande natango oimbuluma tai lopotwa.
“Ombelewa yange otai ka longela kumwe noshikondo shopolifi okukandeka oimbuluma moshitukulwa,” Shikongo ta ti.
Ngoloneya okwa ti natango okwa pandula ouministeli weameno nomataulikilo okeengamba eshi tau twikile okutunga oitaashi yopolifi moshitukulwa.
=Okwa ti komukunda Onheleiwa okwa tungwa oshitaashi shopolifi shi li pongushu yoshimaliwa omiliona N$9.5.
“Oshitaashi shopolifi kOhakao osha longululwa molwashi okwa li sha kulupa,” ta ti.
Ngoloneya okwa ti oitaashi yopolifi oya fimana molwashi otai yakula oshiwana okulopota oimbuluma pefimbo.
“Opolifi moshitukulwa shetu otai twikile okukaleka po eameno nelandulafano efimbo keshe,” ta ti.