Onḓuvasaneno Yapamwe, yOjoint Declaration, ousupi OJD, kanaai suvisa ozombepo zovakuru novaṱi.

Ozombara zOvaherero nOvambanderu maze tja maze zirire kotuhindo tu twa tandwa mouparanga wehi i yohoromende novahindwa novaungure vayo okuhurusisa OJD koviwaṋa vyozondekurona zaimba mba hupa kOtjiṱiro Otjindjandja. Ozombara maze munu kutja OJD kangeri omautiro kaparukaze wakatjotjiri mokutanda ondjira yokutja Otjiṱiro Otjindjandja tji varwe nokuzemburukwa otjatjo i yohoromende yEhi rOvandoitji. Tjinga otjo nandarire kokutja OJD kandji ri omautiro poo kandja sere okuṋuṋunga nokutanda ondjira youatjiri motjiṋa hi, oyo otja tji iri nai ya isamewa ombihu. 

Ozombara nḓa Omandaha za karere nombongarero yohakahana okutara epu rimwe uriri, ndi ri ongondjero yohoromende novahindwa vayo okukondjisa okuvepoporora kokutja ve yakure OJD. Tjinga nai ozombara aihe kourike wayo ai hokorisiwa i yovahindwa mba. Omahokorisiro omasenina aye ri kokutja ze yandje oruvara kozombongarero nḓa tandwa motukondwa, tjinene itwi mu mu turira ozondekurona zaimba mba hupa kOtjiṱiro Otjindjandja.  Yemwe yawo ngari inga wa Ueriuka Tjikuua novakwao ngwa vangere okuhakayena nozombara za Kandjoze. 

Munao ozombara otji maze rihumburura mozombongarero nḓa tandwa i yohoromende na wina maze kwambere ko oviwaṋa vyazo okuhina okurira orupa rwazo poo okuṋuka meyuru muzo. 

“Katu nouzeu nOJD ndji ri, omaunguriro wakumwe pokati kozohoromende azeembari otja komaunguriro wazo kumwe pokati kazo. Omaunguriro wazo kumwe ye kara po okuza kongutukiro. Neṱe katu na indi twa karere nouzeu nawo,” maze tja. Ama ze raisa kutja ouzeu wazo porwe omaunguriro inga nombatero yEhi rOvandoitji kOnamibia okutjitisiwa ayo otji tjiri otjisuta ozo tji ze paha okuza kEhi rOvandoitji. Ndji he ri ombatero kehi yOJD.

Naze ye yarukire po rukwao nokunakaura OJD amaze tja maze panḓere naze riyandjere komazengururiro omanauatjiri wEhi rOvandotji ndi mari yakura katjotjiri kutja mOnamibia mwa ri Otjiṱiro Otjindjandja tjovakuru vawo. Omayakuriro ngu maye kongorerwa i yokuriyaya kEhi rOvandoitji otja tji pasere otja kOnḓuvasaneno yOmihoko Omikutasane yo 1948 ndji tja Otjiṱiro Otjindjandja ongatukiro youndu. 

Ngunda ape ri nao omutjange ingwi wa munine orutuu romaṋangero okuza kOngooneya ya Rongo kOmbara Manase Zeraeua kombongarero yondjivisiro” ngunda moura wayo amai hungirire wina kombongarero ohonge, oworkshop”. Ndja ri mOritjatatu mOmaruru.