Ojoint Declaration (OJD), ndjiri onḓuvasaneno yohoromende ya Namibia nOyehi rOvandoitji ndji ze tja ohunga nOtjiṱiro Otjindjandja, Ondjesiro nOtjisuta, ngai we nondjira komurungu okotjisuta. 

Ondiri embo ehongonekwa pomazemburukiro wOtjiṱiro otjindjandja oyetja 18 mOtjozondjii omayuva womasuviro nga. Ozombara zOvaherero nOvambanderu mu tjiva zozombara zomihoko imbi tji maze ṱungukire kouye womeva okukakara potjitjitwa hi. Wina otjokutwa okuwoko ketemba okutwara komurungu nokuitwa pondondo yarwe ongondjero yOtjisuta. Tjingetjo wina otjombura Oruwano rwa Afrika ndji rwa raisa Otjombura yOtjisuta tja Afrika kohangauti nondjuriro yohuurire yovakwatera va Afrika mu mwari wina omaumino wovakwatera va Afrika nokurandisiwa komahi wOkongurova ku va karirisirwe ovakarere ape ozombura kombanda 400 nḓa kapita. 

Ozombara za Kandjoze otja tji ze rihungirira kutja maze sokuvaza koviwaṋa moupapi nouparanga wehi okukevizuvisa ouhasemba wOnḓuvasaneno yApamwe, OJD, me ze munu kutja omakawondjero womomivanda vya Tjozondjii otjorupa rwomazemburukiro wOtjiṱiro Otjindjandja, tjinene imba mba pandjara ominyo vyawo mu rumwe rotumbo twohangauti yohuurire yEhi rOvandoitji mOsouth West Afrika, Onamibia otja tjaari tjiukwa mohuurire, ongeri wo kuwo okukautira po otukosi twazo okuhonga oviwaṋa ouvi notjiwova tjOnḓuvasaneno yApamwe OJD. 

Nandarire kutja nai Onamibia ya hara otjiuru tjehi otjipe, Netumbo Nandi-Ndaiwah (NNN), na wina ondjuwo yozoveta ombe oitja hambondatu, ozondekurona maze munu kutja kape na indji ombi yombatero nu zeri muzo ozeni nondjira okomurungu mongondjero yOtjisuta. Tjinga nandarire ngwa rire otjiuru tjehi nai ayeri pe kara moviṱo pekepeke otjisenina tji tjari Otjiuru tjOkehi ndjiri omberoo ndji ungura natjo, posi ya nokuhina ombatero. Pendje na nao wina wa hingi oruveze orure otjOministera yOzongaro Pokati Komahi nOmaunguriro Kumwe nu ke na indu wa eta ombangu. 

Na ingwi nai ngwa rire Oministera Selma Ashipala-Musavyi wa senine ayeri omukaramenepo wa Namibia kOakara, tja Ghana, ombura ndja zuko ku kwari ombonagrero yOruwano rwa Afrika ohunga nOtjisuta posi ya pu pa zuvakwa ayo kapari kuyo. Okutja wina ozondekurona otji ze hi novingi mbi maze undjire kuye. Ngunda ozondekurona Lucia Witbooi ngwa rire Otjiuru tjOkehi nu nambano ngu ma ungura notjiṋa hi aye tjiukwa kutja wa pukata OJD.