ONGWEDIVA – Oshinovele sheedula 16 oshi li tashi li lele shoovene notashi xupu shokadila mOngwediva eshi ina a xulifila kondje yoshilongo ye xe nghene vati a dalwa emumone.

Lazarus Junias okwa ti okwa hovela okudja momapandaanda munini nopaife oha di koshi yomuti oko eli ta dengelwa ko kofela. 

Junias okwa holola kutya konooli okwe ya ko mo2023 oku dilila koWalvis Bay oko a li ta fikola ko Kuisebmund primary school. Junias okwa xulila ashike modondo onhihamano. Kowambo ove ya kwali okukonga ouxipilo mOndangwa voo naina omanga ina xulifa. Ina, okwa li omukwashiwana waZimbambwe. 

“Moule ashike wefimbo lixupi olo twa kala mOndangwa, meme okwa dengelwa ongodi tai holola kutya meekulu koZimbambwe okuudite nai,” ta holola ngaho. 

Okwa twikila kutya ina mokuya koZimbabwe vati okwa monena ko oshiponga nokuxulifa. 

“Eshi meme afya, opo nee nda tameka handi mono oixuna. Meme ou kwa li ha tonatelenge okwa fiyange po shaashi kape na ou tadulu okufuta, nomeumbo omu twa li hatu di onda tewa mo shaashi kape na ou ali ta futile nge” ta hokolola.

Junias okwa twikila kutya nonande eedula daye dishona, ina tula omutwe kepepe. Okwa tameka okukala ha lambalala omapandaanda ta kongo ouxupilo. 

Vati nghee ina a file ina mona nande omunhu temu kongo ye keshi ovapambele vaye mwa kwatelwa xe ou emu dala. 

Junias okwa hokolola ta ti onghalo oye mu fininika a kadje koshi yomuti, oko eli ta monene oixuna konhalo yomhepo. 

“Outalala, odula osho yo omhepo aishe oko hai pwile kolutu lange oku,” ta ti. 

Ngeenge a fya ondjala vati oha xupile ashike mokutoola eendoxa, ye te di twala komangeshefelo oku tonya noku nyanghaula eendoxa noitenda opo a dule oku li monena odola. 

Ashike nande ongaho, ota hokolola kutya ouxupilo waye ihau mu tulifa omutwe kepepe lela shaashi okuna ashike omukumo kutya fiku limwe lomafiku pamwe xe otemu dimbuluka ngaho. 

Okwa ti otai indile oshiwana shimukwafe keshe apa tashi dulu osho yo epangelo limukufe po ngeenge nalo ota li dulu shaashi natango okuna ehalo lokuya kofikola. 

Okwa ti yo okwa hala natango oshiwana shimukwafe mokumukingifa ko xe wedina John Junias, pamwe enongo taafe ngaho ongobe.

-taimihaihambo2000@gmail.com