OSHAKATI – Omulumenhu weedula 38 okwa kwatwa po Etivali eshi vati a kwata okaana kaye keedula 16 onghonga lwoikando ya yooloka.
Ota holoka nena momhangu yamengestalata waShakati.
Opolifi oya koleka tai ti okaana oka kala nokukwatwa onghonga okudja omwedi Aprili fiyo Juli meumbo lavo kolukanda Evululuko mOshakati.
Otaku hokololwa kutya omufekelwa ou okwa ufana okaana kaye monduda nelalakano opo ke mu fine eembulwa moshipala.
Vati omulumenhu okwa tameka okukwata omonakadona komavele nokutwata okaana koukainhu wako.
Opolifi oya hokolola tai ti okaana oka li okulombwela xe kutya ine ka kwata vali komavele ashike okwa kala ta twikile.
Okudja opo vati okwa ya nako moixulo ndele ta ka ningile omatilifo.
Opolifi oya hokolola tai ti omulumenhu okwa lombwela okaana kutya ngeenge oka lombwela ovanhu kutya oka kwatwa onghonga ote lidipaa.
Natango, neudo momwedi Juli, omulumenhu ou okwa ya monduda yokaana kaye ndele natango te ka kwata onghonga lwoshikando oshitivali.
Omufekelwa oku li omunailonga womofitola.