Opolifi koshitukulwa Erongo oya kwata po okamatyona keedula 18 omo ta ku fekelwa kutya okadipaa omukulupe weedula 86 noutekulu waye vatano mexuliloshivike.
Oshiningwanima osha ningwa Olomakaya efimbo lokeengulasha kolukanda Hakhaseb modoolopa yaUsakos.
Omupopiliko wopolifi moshitukulwa Erongo, Chief Inspector Ileni Shapumba okwa koleka ta ti okamatyona oke li omupambele woonakufya.
Otaku hokololwa kutya omufekelwa okwa ya monduda omo kwa li mwa nangala omukulupe nounona ndele teva denge nekuva.
Opolifi oya hokolola tai ti nokonima yefimbo omufekelwa okwa tomeka omundilo komalutu oonakufya.
Oonakufya ova tongolwa ovo omukulupe Elisabeth Naruses, omunafikola kwa li e li mondodo onhi-11 Fenny Naruses weedula 18, Ibra Naruses weedula hamano, Rachel Boer weedula nhatu, Emi Naruses weedula nhatu, Raunisha Boer weedula hamano.
Ounona aveshe va xulifa oukadona nokwa li hava di meumbo omo.
Ota ku hokololwa kutya omufekelwa okwa li a twalwa koshipangelo metonatelo lovapolifi a ka mone epango molwashi okwa pya keemadi.