Opolisi moshitopolwa shaHangwena oya patululila omusamane gwomimvo 52 ngoka anuwa e li mekwatathano lyopaihole nokanona komimvo 15. 

Okanona kokene sho ka pulwa anuwa oka ti ko inaka kwatwa koonkondo ashike oshoka omusamane ‘omuholike gwako’ noye li mekwatathano lyopahole. 

Omupevikuluntu gwopolisi moshitopolwa shaHangwena Malenie Mbuuru okwa ti oshiningwanima shoka osha holoka kEngela oshiwike sha zi ko. 

Otaku hokololwa kutya omusamane ngoka anuwa okwa li i ithana okanona hoka kaandjawo e ta yi nako miihulo nonando e shi kutya okashona. Sho anuwa okanona ka pulwa oka tindi kutya inaka kwatwa koonkondo oshoka oke li naakuume ke komiihole. 

Oshiningwanima shimwe sha faathana, opolisi moshitopolwa shaShana oyi li molukongo lwomulumentu ngoka anuwa a kwata okanona komimvo 15 koonkondo e ta ka ningi etegelelo. 

Omupevikuluntu gwopolisi moshitopolwa shaShana Frederick Ndjadila okwa ti, oshiningwanima osha holoka momukunda Ompundja muDesemba, nosha lopotwa ashike oshiwike shika sho okanona ka dhimbululwa kutya oke li metegelelo kuyinakulu. 

Sho ka pulwa oka popi kutya oka kwatwa koonkondo. 

Ndjadila okwa hokolola kutya, omatumwalaka ga adhika mongondhi yokanona oga holola kutya omulumentu ngoka okwa heke okanona opo ya tsakanene pehala lyontumba. 

Okanona oka hokolola anuwa kutya sho ya tsakanene okanona hoka anuwa oka li ka ponokelwa komulumentu ngoka e taka kwatwa koonkondo. 

Opolisi inayi yelitha nkene mboka yaali ya pambathana. 

Oshiningwanima shimwe, opolisi moshitopolwa shaHangwena oya manga po omulumentu gwomimvo 17 sho taku hokololwa a dhengagula nokukwata koonkondo aanona yaali, omumati nomukadhona yomimvo, omugoyi oshowo 12. 

Omupevikuluntu gwopolisi moshitopolwa shaHangwena Mbuuru okwa ti oshiningwanima shoka osha holoka momukunda Oshandi pokati komasiku Etiyali nEtitatu. Otaku hokololwa kutya omulumentu ngoka anuwa okwa li a ka tala okanona hoka kokamati pegumbo lyopuushinda noku ka fala kaandjawo. 

Omulumentu ngoka anuwa okwa li a dhenge okanona hoka nomankawa e te ka mangele omaako konima noku ka kwata koonkondo. 

Sho a mana anuwa okwa shuna ko kegumbo hoka e ta ka tala ko okanona kokakadhona e ta tameke ishewe oku ka dhenga noku ka mangela omaako konima, e te ka kwata koonkondo. 

Mbuuru okwa popi kutya kape na ekwatathano lyopahole pokati komulumentu ngoka naanona mboka, ndele aashiinda ashike. 

Omufekelwa ota holoka nena mompangu yamangestalata kEenhana. 

Opolisi moshitopolwa shaShana oyi li molukongo lwomulumentu ngoka anuwa a kwata koonkondo okanona komuholike gwe gopaihole, komimvo 12. 

Sha ikwatelela kiiningwanima ya hol oka mehul i l o shiwike oshiningwanima shoka osha holoka momukunda Omakolombongo moshikandjohogololo Anamulenge. 

Otaku hokololwa kutya okanona hoka kokakadhona anuwa oka li ka kwatwa koonkondo komulumentu gwayina Etitano. 

Okakadhona hoka anuwa oka li ka lala mondunda yimwe, moka omulumentu ngoka a li a yi e ta tameke oku ka pampadhala. 

Sho anuwa ka papudhuka mo moomposi, omulumentu ngoka anuwa okwe ka lombwele ka mwene e te ka mbandameke noku ka kwata koonkondo. 

Opolisi moshilongo otayi lopota omakwatokoonkondo gesiku kehe, ngoka ga mbandameke oshigwana oshoka otaga ningilwa kehe gumwe okutameka koohanona sigo okaakulupe. 

Omakwatokoonkondo otaga lopotwa taga ningilwa aantu ayehe kashi na omulumentu nenge omukiintu. 

Opolisi oya kala nokukumagidha oshigwana shi kale tashi lopotele opolisi meendelelo uuna sha longelwa omiyonena, opo aafekelwa ya vule okumangwa mbala. 

-vkaapanda@nepc.com.na