Omupopiliko wehangano loNAMDIA, Beverley Coussement okwa koleka ta ti opolifi oye shi pondola okumona okawe ke li pongushu yeemiliona N$40.6 oko kwa li ka vakwa neudo koNAMDIA. 

Momukandapitifi wa pitifwa onghela kuCoussement okwa ti ongushu youwe va vakwa koNAMDIA oi li peemiliona N$314.9. 

“Okawe kongushu yeemiliona N$274.3 inaka monika natango. Opolifi oye lipyakidila nokuninga omakonakono,” ta ti. 

Okwa ti NAMDIA ota twikile nokuyandja ouyelele kombinga yoshikumungu eshi. 

NAMDIA ehangano olo hali tuvikile okawe ngeenge taka di keemina. 

Neudo, omwedi Januali okwa lopotwa ovalumenhu vane va ponokela eembelewa doNAMDIA efimbo lokomatango koWindhoek ndele tava vake mo ouwe. 

Pefimbo loshiningwanima sha ningwa kakwa li ku shivike kutya ouwe vangapi va vakwa po. 

Poshiningwanima opa dipaelwa omunailonga woNAMDIA kwa li ta longo ongomukulunhu koshikondo sheameno, Eiseb Francis weedula 57. 

Francis okwa yashwa nondjebo momutwe kovafekelwa pefimbo kwa li e li kombelewa ta longo. 

Opolifi oya hokolola tai ti pefimbo loshiningwanima umwe womovafekelwa Max Endjala okwe liyasha nondjebo meembelewa doNAMDIA eshi a mona kutya okwa fitikininwa mo kopolifi. 

Vamwe vomovatamanekwa vavali Sam Shololo naJoel Angula ove li modolongo shaashi vati navo ova kufa ombinga momunyeka wokawe. 

Oshibofa shavo osha undulilwa komafiku 23 May 2025 opo ku ningwe omakonakono omoule. 

Omwedi wa dja ko, NAMDIA okwa kufa moilonga pokafimbo omunambelewawiliki w avo Alisa Amupolo, omupedunambelewawiliki Uahoroka Kauta nosho yo omukulunhu woshikondo sheameno Paulinus Sheyako. 

-fhamalwa@nepc.com.na