“Muri nawa?”, “Turi nawa Peresindenda!”, onda ririre ehungi etenga pokati komuyaruke Operesindenda Ondenga ya Namibia nu Ihe yOtjiwaṋa, Onongo Sam Shafiishuna Nujoma, noserekaze ye, tje ya ponganda potuingi kombunda omayuva omengi e ha ri ponganda poo mehi.
Otjotjiuru tjehi potuingi ngwaa piti mehi porumwe kaa kakara omayuva omengi. “Kayende nawa musuverwa”, omuhepundu oserekaze yomuyaruke Nujoma, Theopoldine Kovambo Nujoma, wa virikizire nao okupata ehungi re pomayandjero wondjozikiro oseinina pOrutjandja rOngutukiro Oritjatano nda zuko komurungu ombakero Oroviungura pEtjo rOzombangaṋe.
Mombinika ye ndja yandjererwepo i yOnongo Nashilongo Shivute, otjovanatje ngu va nyanda pamwe noserekaze ondengandenga ya Namibia momivanda vya Katutura momaturiro oruveze ndo nu ngamba nge tjikukwa otjOrumbo rOporise (Oporisikamba).
Omaminikasaneno nga yari orusuvero porwe. Ovengi omayuva wetando mba zemburukire omuyaruke Nujoma otjiṋa tjimwe tjaave mu zemburukire ko orusuvero. Pe nomuhewo mOtjiingirisa okutanaura mbu tja “otjari tji utira ponganda (charity begins at home)”. Otjo tjiri nangwari otja kozombinika zomuhepundu na wina ovanatje kutja orusuvero omuyaruke Nujoma ndaa raisa okuutira ponganda.
Onganda ye tjinene ndji he ri eṱunḓu re omuini tjinga oure woruveze orure veṱunḓu re ave hina aa ve kara pamwe naye okuutira kotjirwa tjongutukiro.
Tje vesa kombunda mOnamibia tja hena mehi. Wina motjira tjOswapo eye ma ṱire wari ihe na ina yovengi moutaure.
“Orwetu rwa ri orusuvero ndwa tuurunga ovipwite vyohaṋi youmuhoko, orusuvero ndwa ṱoṋa omarorero woruveze roṋiṋikizire yohuurire nozoveta zokuhaṋa nokuhonapara. Twa kupasana tji ya ri 6 ku Kambundu mo 1956, Atu ha wanisiwa i yorusuvero porwe, nungwari wina i yozongama pamwe zOnamibia ekutuke nongutukiro,” omuhepundu matja.
Utoni Nujoma, erumbi rovakwawo ngwa hungirire po ovanatje, wa matja: “ihe yawo wari oruvao, omurumendu na ihe worusuvero.” “Tatee wari omurumendu omukupe omunarusuvero, nomukazendu we omusuverwa, ina yetu, oserekaze Theopoldine Kovambo Nujoma, oserekaze ondengaondenga ya Namibia, na wina ihe omuṱakamise wovangu vandje na ami, nu wina otjiuru tjotjikutu omundu mu mo twa mo ongamburiro yo ku tjitjitjizika ngwa yandjere omuinjo we kondjeverero yovikutu avihe vya Nujoma, Kondombolo na Mushimba.”