I Mbatjiua Ngavirue
OTJOMUISE
Otjiuru tjOvapangure, Olivia Imalwa, marakiza nomasa ovaporise mbeyandjera otjiwana omananununino woviposa vyorutjero kutja maveyenene okurondorua ko matu nduuziro woma katukiro woveta.
Imalwa wa ziririre kepuriro rokutja hapo okunanununa oviposa vyotutjero tjitjiri otjina tjeyapa yuva mOkakara opendje noveta poo indee? “Ndoovazu oporise mainanununa oviposa vyotutjero kuyo oini okutja ete ndinondi tuna ouzeu ounene mbu mauhepa okukondononwa,” watjere naweza ko kutja itji kuye tjeya otjo tjikumise navanga okutjiwa kutja ousemba imbwi oprise iisapi?
MOkakarara ovahamisiwa iyo tutjero peyapa yuva veyenda koporise oku kaningira omaisakisiro woviposa vyo tutjero. Makuzu ovaihanisiwa imba potuingi veninikiziwa iyo ovanene vawo poo omihoko vyawo nave popwa kutja vepahe okusutua otjimariva poo otjina tjarwe. Ounepo wotjiwana tja Kakarara waraisire ondjemeno indji koruhindo rounepo wOkomiti Ndjitara Koruhepo rOvaungure Mehi, Ondumbiro yOvandu nOtjiwana yOndjuwo yOzoveta katjisupi.
Olga Tjiurutue wOrutu rOmekurisiro wOvakazendu indui o WAD, waraera ounepo wOndjuwo yOzoveta ohunga notjisposa tjomukazona wozombura o 16 ngwatjerwa tjazumba avanga okusutua ozongombo ine. Kombunda pa kamunika kutja eye watoora Ondui yEhinga mena ro rutjero indui.
Outjavari kotjihavero moporise ya Kakarara, Serisanda Daniel van Wyk, watjere oporise kaina omwano warwe ndoovazu omuni wotjiposa watie okutjiisako.
Watjere momweze oporise iyakura ape otjiposa nganduu ku vivari vyorutjero. Kohapo virira oviposa vyovandu vevari mbena poo mbari noupanga kumwe. Wanunisire kutja ovatjerwa ohapo ve nanununa oviposa vyao ovanene tjive vepoporora oku tjituara kotjombanguriro tjombazu. Porumwe omatundu ayeevari inga yesuvasana otjisuta.
Van Wyk watjere otjitandi pokati kovakazendu novarumendu mOkakarara potuingi tjikara momitanda omapanga romuzandu patono omukazona. Omavinu poo ovipurukise potuingi virira otjipo.
Tjahungirire mena rOmbara Uaakutjo Kambazembi, Omutjangerepo wOndjuwo yOuhona wa Kambazembi, Mujazu Urika, wa pandererere potjiungura tjouhonapare wombazu. Watjere ouhonapare wombazu kauningire ovandu okunanununa oviposa ko porise nungwari irira ondero yao oveni.
Imalwa watjere omatombero woveta tjimuna otutjero katjina tji tjitua komundu kourike we uriri nungwari wina kehi na kotjiwana atjihe. Ongundeveta ipa ovyuru vyo vapangure ousemba wokurondora poo okuhina kurondora pendje na indu tjivyandja ousemba imbwi kovo kehi yavyo. Omasa yoporise yeyandera po ngondononeno nu tjeri ohepero wian pouhatoi wo kunanununa okuza komwiihamisiwa.
Tjiazumbo oporise yasere oku kakaterisa ouhatoi imbwi komatjangwa wotjiposa posyo aikaenda komurungu nongondononeno yatjo. Okuzambo aihindi omatjangwa ayehe wotjiposa kotjombanguriro tjorukondua.
“Nandarire ingwi omupangure worukondua kena omasa wokutia okunanununa oviposa ovinene mumuna orutjero.”