Taimi Haihambo 

Eenhana – Ngoloneya mupe woshitukulwa shaHangwena Kadiva Hamutumwa okwa ti okwa tambula oshilonga shaye shipe shoungoloneya osho e linekelelwa kwaavo ve mu hoolola, ashike ita ka longa noukombuda. 

Edi okwe di popya pefimbo a li ta tambulilwa moilonga ipe youngoloneya mEenhana, nokupewa ombelewa pambelewa kungoloneya mukulu Sebastian Ndeitunga oo a uka moshipundi shetulumuko. 

Ndeitunga pefimbo a li ta tambula noku pa Hamutumwa ombelewa youngoloneya, okwa yelifa kutya Hamutumwa okwe ya moshitukulwa shakula noshi na omwaalu wovanhu va konda po 37 729, osho sha etifa shi kale shitivali ngeenge tashi uya kovanhu vahapu moitukulwa yaNamibia. 

OkwatwikilakutyaHamutumwa okwe ya moshitukulwa shi hadi omashongo, noshi na exumokomesho tali shongola. Omashongo ongaashi eepate, ouxupilo womeva, oipangelo yakula ihe shi oukilinika, osho yo eendama dokuhakela omeva aa haa di moAngola nohaa kwafele Ovanamibia vahapu. 

“Oongoloneya vakulu, naame nde likwatela mo otwa kendabala apa hatu dulu notwa hala u twikile apa twa xulila. Lela oshiwana u shi na komutima, kaleka kokule oukombuda ndele dama moufikepamwe ngeenge tashi ya pokuvatela ovanhu,” Ndeitunga ta ti. 

Hamutumwa okwa ti oshilonga shaye oku shi shi nawa momutwe ngaashi e shi lombwelwa komupresidente efiku a hoolowa ongangoloneya; shokulela nokutula eemhumbwe doshiwana moilonga. 

“Onda hala fyee Ovahangwena tu longeleni kumwe nawa noneudafano opo eshi olweefo lange loungoloneya tali ke ya pexulilo konima yeedula nhano, atushe ohatu ka popya nounhwa hatu litange hatu ti otwa longela kumwe, noidjemo iwa ohatu i tyapula pamwe,” Hamutumwa ta ti. 

Okwa ti ota ka longa noudiinini ngeenge tashi ya pelongifo loshimaliwa a fye oshisho kutya osha longa mokukwafa oshiwana nombelewa yaye oya yeulukila aveshe va pumbwa ekwafo. 

Hamutumwa okwa hoolowa komupresidende waNamibia Netumbo Nandi-Ndaitwa mu 1 Juli 2025, ongangoloneya woshitukulwa shaHangwena. 

Oye yoo ngoloneya wotete womukainhu moshitukulwa nomutitano koshipundi shoungoloneya.