Auleria Wakudumo
Onghalo yeehombo dihe li paveta, oya eta opo omukainhu umwe novena va fiwe pomutenya kovakwanedimo vomusamane ovo vati vahanauna eumbo noku tukula epya pokati moshikandjohoololo shaMuthiya.
Otaku hokololwa Sackaria Matheus a dile komomukunda Ouhongo mOshitukulwa shaHangwena a li e na omaumbo avali -limwe okOuhongo, naliwalo okEdiva lOndjaba koshitukulwa shaShikoto.
Omukulukadi waMatheus wopangeleka nopaveta vati okwa kala keumbo lavo lokOuhongo, ashike nokEdiva londjaba nako okwali e na ko omukainhu, oo paife ta ti oye omufiyekadi oo a nyekwa omaliko kofamili yaMatheus.
Matheus nomukulukadi waye wopaveta ova xulifa mo2021, veli pitifila po ashike oivike ivali. Omukulukadi oye a xulifa tete.
Ndilimeke Nashivela (42) oo a kala kEdiva Londjamba, ota hokolola kutya okudja pefyo lomusamane waye, ovakwanedimo vaMatheus ova kala tava kondjifa nokumuumba omalaka a honga opo va fyuulule oinima aishe meumbo. Ta ti eshi ovakwanedimo ove shi ninga nande va kala vemu shi nawa kutya ye omukulukadi waMatheus shaashi ovo vemu konga opo a hombolwe kuMatheus. Ta ti ove na ounona vatatu veli pokati komido 13 needula nhano. Oka koshiveli oka dalwa manga inaya aka dje meumbo laMatheus.
Ashike eshi Matheus a xulifa vati oosuwala shaye ove mu fiya pomutenya, va hanuna mo eenduda mbali dekuma meumbo ndele tava fiye oinima yaye poluhaela. Oshinima eshi oshe mu eta opo a patulule oshibofa.
“Pehovelo onda lopota ashike oshiningwanima kopolifi yaMuthiya, ka ndali nda hala okupatula oshibofa shaashi ovanhu ovedimo lomusamane wange,” Nashivela ta ti.
Opolifi oye va londwela nova kala va pandapala molwa elondwelo lopolifi.
Ta ti kakele kokuhanauna po eenduda, ovakanedimo ova tukula epya pokati, noku kufa po etata limwe.
“Ova kondjifa yoo ndi tukule oilya mokaanda, ashike onde va lomwela vaye kumwene womukunda opo ndi shi ninge nawa.
Konima yoku tukula oilya ovakwanedimo ava vati ova ka ya meumbo pefimbo Nashivela ehemo meumbo ndele tava hanauna eenduda mbali, tava kufa ko oipeleki ndele tave i tutile meumbo la umwe oo a pewa ko kepya.
Omumwaina waMateus meenghundafana naKundana okwati Nashivela kali a hombolwa kuMatheus shaashi Mateus okwali a hombola paveta omukulukadi oo naye a xulifa hanga oshita nomusamane waye. Ta ti omukulukadi oo a kala keumbo lokOuhongo oye okukulukadi wamumwaina a kala naye oule weedula dihapu.
“Fye otu shi Matheus a hombola omukulukadi waye oo a dja naye
kombada. Ndilimeke okaana, okafuko keya ashike keumbo lomusamane olo i ha di shaashi okwa kala eli keumbo laye lakula nomukulukadi waye kOuhongo. Ota kala omufiyekadi ngahelipi ngeenge nokaafya kali ko. Oto kala ngaho umufiyekadi ndele ito fudike omusamane woye?” omukwanedimo ta pula.
Ta ti Nashivela okwa kala ashike ha veli mono naMatheus moixwa yavo nokonima okwe mu eta meumbo kEdiva Londjamba.
Omukwanedimo ou ta ti ovanhu mooMatheus ova kufamo ashike vati oipeleki vayo, oyo va dika meumbo lamumwaina omo va kala hava di omanga Nashivela ina ya mo.
“Ndilimeke paife ota taata ovanhu sho osho nee kwa tokolwa va tukulilwe epya opo va kale vena onhele yavo. Okwa shaina nombaapila yoku yandja epitikilo opo oipeleki oyo ikufwe mo meumbo.
“Kafuko oo inatu mu tataa meumbo noxo ita tewa shaashi okuna ounona. Ndilimeke ngeno okwali noxo ehole omusamane ngeno okwaya keenghali daye. Ounona vaye navo inavaya keenghali daxe voo inava djala oshipando shaxe,” omukwanedimo tava ti.
Nashivela eshi a pulwa kuKundana ngeenge okwa shaina shili opo ovanhu va kufe mo oipeleki yavo meumbo okwati; “onda shaina shili kutya ovanhu nava kufemo oipeleki yavo, ashike onda fininikwa okushaina ombaapila oyo kelelo lomukunda”.
Minista woukashikekookanhu nonghalo nawa younona Doreen Sioka okwa kumaida ovakwanedimo va longele kumwe.
Minista okwa kumaida omukulukadi opo a twale oshinima shatya ngaha komangu. Okwa wedapo tati modula taiya Namibia otaka wilika engudumano loAfrican Widow va pewe owino woufemba wavo opo oinina yatya ngaha ikeelelwe.
Sioka okwa kumaida yoo ovakwanedimo va xulifepo okuliyambapeka okupila momaliko oonakufya. “Nakufya ngeenge okuna ounona ngaashi ovo va shona natango, nava fyuulule oinima yovakulunhu vavo, Sioka ta ti.
Sioka okwa yandja oshihopaenenwa shounona kutya “nava shiive kutya ngaho otava ningi oilonga yepangelo idjuu shaashi ounona ovo tava fiye moluhepo otava ka fininikwa va ninge oihayotwa nokutembukila kedoolopa tava ka konga ouxupilo shaashi ashike oinima yaxe tai kufyapo”.