“Omukambo omuwa tjinene nomuhunga mbu ri wo,” Ombara Otjitambi yOvaherero Hoze Riruako wa yakura nombano inga ongutiro yomahi wa Afrika okutwara epu rondjuriro yohuurire kOruwano rwa Afrika kombongarero yayo yombura aihe ndji mai haama mu Tengarindi ombura ndji mai yende. 

Tjinene mombii yokutja Ovaherero, Ovambanderu nOvakwena ve kondja nondjuriro yawo yOtjiṱiro Otjindjandja i yohoromende yohuurire yehi rOvandoitji. 

Mena rokutja oruveze orure mena rokutja va kondjo notjiṋa tji aveyerike, ohoromende yehi rOvandoitji nouye pu i he ve twara kotjiuru. Ma tja tjaave utu nongondjero ndji aave tjiwa kutja ondjirakati ovandu ovengi mave rikutu kutjo. Tjinga omahi omengi wokongurova aaye tira kokutja ehi rOvandoitji tji ra itavere ondjo, omahi omengi wokongurova maye hara ondira. “Posi ya imbwi kau sere okurira ouzeu orondu ondjuriro aihe ya sere okupuratenwa nokutjindwa otjondjuriro kuyo oini,” Ombara Riruako ma tja. Eye wari ama hungire pombongarero yozombuze Oritjatatu mOtjomuise. 

Ma tja ohepero omahi ayehe inga okukuta epango momakuruhungi wohuurire nondjuriro wawo novandu vayo. “Otjeri ohepero kweṱe okuya pamwe nokuyandja omasa kovimbumba vyetu. Kutja kangamwa auhe wetu tji ma ungurura omukwao me tji tjiwa nokuyandja ko omasa.”

Ngunda aperi nao imwe yozondekurona ozombyuke mongondjero yotjisuta, Jephta Nguherimo, ama zirire kehungi rOministera ya Namibia yOngaro Pokati kOmahi nOmaunguriro waKumwe, Selma Ashipala –Musavyi, ma tja omambo we yandjwa rukuru. 

Ashipala –Musavyi, wari pombongarero yOzoministera za Afrika zOvitjitwa Vyopendje ndjari motjihuro ohongora tja Algeria, Oalgiers tji ya ri 30 ku Tjikukutu ngandu etenga ku Tjitarazu. “Matu yandja omasa kokutja ouhazendu wohuurire i tuwe moveta. 

Omauhazendu wohuurire maye sokuzemburukwa moveta youye omuano tjingewo Otjiṱiro Otjindjandja, ouhazendu womovita nouhazendu koundu,” Ashipala –Musavyi ngwa nanene poruhindo rwa Namibia wa tjere.

Posi ya Nguherimo ma tja omambo omawa we inga nandaku pokuhungira kwe oo pokutjita kohoromende ya Namibia. 

Ngunda amai tja nai okuza motjinyo tja Ashipala –Musavyi, katjisupi erero monganda yo ndja ungurisire otjimariva tja Namibia okuvatera Ehi rOvandoitji okuhina kukuramena motjombanguriro mOnamibia. Ku ku he ri motjiṋa tjarwe nungwari tjingetjo mouhazendu wayo wohuurire mbwa twara kOtjiṱiro Otjindjandja.