Auleria Wakudumo
Ehangano lomavalulo moshilongo – Namibia Statistic Agency (NSA) – ola holola kutya omwaalu woilonga okudja koikondo ya yooloka owa shuna pedu novanhu ve li 179 000 moule weedula nhano, hano okudja mo2018 fiyo 2023.
NSA okwa holola yo kutya eepelesenda dovanyasha ve na oilonga nado oda shuna pedu nopelesenda 1,7. Momudo 2018, eepelesenda dovanyasha vehe na oilonga oda li 46 ashike mo2023 eepelesenda oda ninga 44.
NSA eshi okwe shi holola pefimbo ta yandje omwaalu wovanhu ve na naavo vehe na oilonga onghela mOvenduka.
Ehangano ola yandja yo ouyelele woitukulwa i na ovakwashiwana vehe na oilonga omo omwaalu wovakwashiwana vehe na oilonga moKavango West wa ya pombada.
Mo2018, Kavango West okwa li e na eepelesenda 33 dovakwashiwana vehe na oilonga, ashike mo2023, eepelesenda oda ya pombada da ninga 53.
Omanga oshitukulwa shaMusati sha dja keepelesenda 24 dovanhu vehe na oilonga mo2018 sha ya keepelesenda 4.
Ohangwena nayo oya lundulula.
Oshitukulwa eshi osha li shi na eepelesenda 33 mo2018, ashike mo2023 eepelesenda dovanhu vehe na oilonga oda ya pombada neepelesenda 14. Mopaife Ohangwena oi na eepelesenda 47.
NSA okwa weda po ta ti oitukulwa ngaashi //Kharas, Hardap, Kunene, Omaheke nOtjozondjupa oya shuna pedu monghalo yokuhe na oilonga.
NSA okwa holola yo kutya oshikondo shounamapya, omidingonoko noikwafuta osho shi li sha yandja oilonga ihapu kovakwashiwana momudo 2023 neepelesenda 16 moule weedula nhano.
Nande ongaho, omwaalu owa shuna pedu. Mo2018, oshikondo osha yandja oilonga kovakwashiwana 167 242 ashike mo2023, omwaalu owali ashike 88 277.
Omanga oshikondo shehongo sha yandja oilonga kovakwashiwana 38 209 hano eepelesenda 7 okudja mo2018 fiyo 2023. Eshi otashi ulike kutya oshikondo osha yandja oilonga ishona moule weedula nhano.
Mo2018, oshikondo osha yandja oilonga i li 46 923.
Oshikondo shouhaku nexungomwenyo nasho osha shuna pedu meyandjo loilonga. Mo2018, oshikondo osha yandja oilonga i li 19 527 ashike mo2023 oshikondo shouhaku osha yandja ashike oilonga i li 18 448.
Oshikondo shimwe sha yadja oilonga kovakwashiwana vahapu, oshikondo shoikwamina. Mo2018, oshikondo osha li sha yandja oilonga 12 087, ashike mo2023 osha yandja oilonga 14 337.
Eshi otashi holola kutya osha ya pombada no 2 250.
Oikondo imwe ngaashi okunduluka nako okwaya pombada. mo2018, oshikondo shokunduluka osha yandja oilonga i li 45 057 kovakwashiwana nomo2023 oshikondo osha yandja oilonga 53 491 kovakwashiwana.
Oikondo ihapu otayi ulike ya shuna pedu mokuyandja oilonga. Nande ongaho, NSA okwa holola kutya omwaalu wovanhu vehe na oilonga owa ya pombada neepelesenda 3,5 okudja mo2018. Tashi holola kutya mo2023, omwaalu owa fikama peepelesenda 36.9 novanhu 320 442 kave na oilonga.
-wakudumoauleria@gmail.com