Severus Imbili a shivika nawa Tate Meke okwa ti kape na oshinima hashi mu etele ehafo nombili sha fa ngeenge ta imbi omaimbilo opamhepo. Okwa ti okwa tameka okwiimba momudo 2008 pefimbo a li mondodo onhi-12. “Ondi udite etumba okulongifa ounongo wange wokwiimba. Ounongo ou onda dalwa nawo,” ta ti. 

Okwa ti ohai imbi omaimbilo ta hekeleke osho yo okuxunga ovanhu omwenyo. “Ovanhu vahapu ngeenge tava pwilikine omaimbilo ange ohava kala ve udite ombili nehafo,” ta weda po. Okwa yelifa ta ti ovanhu vamwe ohava kala vehe na ombili yokomwenyo shaashi va kanifa ovaholike vavo ashike ngeenge ova pwilikine omaimbilo aye ohava mono omhepo ipe nokukala ve na omukumo. 

“Omaimbilo ange natango oku na omatumwalaka okutwa ovanhu omukumo osho yo okukumaida ovanyasha,” ta ti. Okwa ti omaimbilo aye natango otaa yandje ehongo koshiwana noku va dimbulukifa kutya Kalunga oko e li ta udu omailikano ovanhu. Okwa hokolola ta ti omudo wa dja ko muDesemba okwa pitifa omaimbilo e li 10. 

“Onda imba omaimbili a yooloka e na oipalanyole ngaashi Omwa silwa onghenda, Othithiya, Ombizi nolutu, Okukondjela, Epata limwe nosho tuu omaimbilo amwepo a yooloka. Imbili okwa ti oku na eengudu nhatu domalwiimbo da shivika nawa Meke lOmuw, imwe oi li koWindhoek, yimwe okOnyaanya omanga imwe oi li koWalvis Bay. 

“Keshe omunhu okwa manguluka okuya a tameke olwimbo,” ta ti. Okwa hokolola ta ti natango oha deula ovanhu ovo va hala okulihonga okwiimba. Okwa ti oka-CD kamwe komaimbilo oke na N$150 omanga oka-USB oke na N$250. Ota monika konomola yongodi yaye 0813443130. 

“Natango ohandi kala komapandja okomalungula handi imbi. Ondi na ovalanduli vahapu komalungula,” ta ti. 

-fhamalwa@nepc.com.na