OSHAKATI – Aalongwa ya za koosikola nokiiputundhilo yopombanda ya yooloka opamwe nehangano tali ithanwa Heavenly Dreams Foundation moshitopolwa shaShana oya ningi omunyanyo okuulika uukwawowanankali naakwanezimo yaanona yatatu ya dhipagwa kOkahandja omasiku ga yi. 

Omunyanyo ngoka gwa ningwa ongula yEtiyali ogwa ningwa okuza pombaanga onene yaNamibia sigo opombelewa onene yopolisi mOshana. Uuministeli owa longekidha ominyanyo oshilongo ashihe, nopolisi oya li ya longekidhwa miitopolwa ayihe opo yi thindikile aalongwa. 

Momushangwa ngoka gwa taambwa ko komupevikuluntu gwopolisi moshitopolwa shaShana Frederick Ndjadila, omwa indilwa opo opolisi yi tsikile okulonga nuudhiginini opo mboka ya longa iilonga mbyoka yi nyanyaleka ya mangwe. 

“Iiningwanima yi nyanyaleka otayi holoka esiku kehe moshilongo, mwa kwatelwa omakwatokoonkondo, omadhipago niimbuluma ya yooloka, shoka tashi ulike kutya okwa pumbwa okukuthwa onkatu yegameno,” omushangwa gwa leshwa ngaaka. Gwa tsikile kutya nonando pe na omilando noompango dhi li po iiningwanima mbyoka otayi indjipala esiku kehe, ihe shika itashi mangulukitha okanona Okanamibia. Taya ti, iinigwanima yi nyanyalitha ya ningwa kOkahandja, oya eta puuyelele nkene aanona inaya manguluka moshilongo muka, shoka tashi mbandameke aanona ayehe. 

“Otwa hala aaleli yopombanda opo ya kuthe onkatu opo ku tulwe miilonga egameno lyAanamibia ayehe mwa kwatelwa aanona, opo Namibia a kale e na ombili nokwamanguluka,” taya indile ngaaka. 

Ndjadila sho a taamba ko omushangwa ngoka okwa uvaneke oku gu thikitha koombelewa hoka gwa nuninwa opo ashihe shoka sha tothwa mo shi vule okutulwa miilonga. 

Omulongwa posikola Oshakati Sekundo, e li mondondo 11 Kaluwapa Zeneena okwa ti, omadhipago ngoka oge ya pe uumbanda. 

“Shika otashi ulike kutya inatu manguluka we moshilongo shetu, onkene otwa hala opolisi yi longele kumwe noshigwana opo mboka ya longo iilonga yi li ngaaka ya mangwe, yo ya pewe egeelo lya kola,” ta indile ngaaka. 

Zennena okwa indile wo oshigwana nasho shi longele kumwe nokutseyithila opolisi, ngele sha mono uuyelele kombinga yiiningwanima mbyoka. 

-vkaapanda@nepc.com.na