OSHAKATI – Elelo lyondoolopa lyaShakati olya gandja egeelo kumwene gokaloli haka pombo onyata, sho ka adhika taka pombele onyata moshana, popepi nokanaala komeya osho wo momeya gomiishana. 

Okaloli hoka ka li ka lopotwa kaakwashigwana, oka li ka kwatwa kaanambelewa yelelo yondoolopa osho wo kaanambelewa yuuministeli wuuhaku nonkalonawa omanga taka pombo onyata. 

Ngoka kwa li ta hingi okaloli okwa li a matuka po a thigi po okaloli, ihe shoka kasha li sha pondola sha oshoka okaloli oke shiwike nokwa ndhindhilikwa kutya ohaye shi ningi shito. 

Aanambelewa mboka ya li ya thiki po oya li ya dhengele mwene gokaloli hoka. “Otu na mpoka twa gandja hapu tililwa onyata, ihe oshigwana otashi tsikile okutilahi oonyata kehe mpoka. 

Tala aantu taya kwata oohi tadhi ka liwa, nomeya ngaka otaga kungulukile momeya moka, natango okanala komeya kake li kokule,” omunambelewa ta nyenyeta ngaaka. 

Taya ti, yo oye na nuundjolowele woshigwana, onkene otaya gandja egeelo lyoshimaliwa shontumba kumwene gokaloli hoka oshoka otaya ningile iinima owina. 

Omugandji gomauyelele melelo lyondoolopa lyOshakati Katarina Kamari okwa ti, oya kala nokukunkilila oshigwana shi kaleke ondoolopa ya yela osho wo okuyanda okutaaguluka omilandu dha tulwa po. “Oshigwana osha kala tashi kumagidhwa shaa tilehi onyata kehe mpoka mondoolopa, ihe nashi ka tilehi hoka ya lombwelwa,” ta popi ngaaka. 

Kamari okwa ti, uuna pe na ngoka a konda omilandu oha pewa egeelo lyokufuta oshimaliwa okuza N$2 000. 

Otandi indile oshigwana shi kale aluhe tashi landula nokugwanitha po omilandu dha tulwa po. “Otandi pandula wo oshigwana shoka sha lopota oshiningwanima shika, nashi tsikile natango okulopota ayihe inaayi pitikwa mondoolopa,” ta pandula ngaaka. 

Kamari okwa ti kehe ngoka ta ka tsikila nokweendulula iilonga inaayi pitikwa kelelo lyondoolopa otaka ka tukilwa onkatu ya landula ko. 

-vkaapanda@nepc.com.na